সংসদৰ নিৰাপত্তা ভংগ: চাৰি অভিযুক্তক সাত দিনৰ আৰক্ষীৰ জিম্মালৈ প্ৰেৰণ

কালি সংসদৰ নিৰাপত্তা ভংগৰ অভিযোগত গ্ৰেপ্তাৰ হোৱা চাৰিজন অভিযুক্তক সোধা-পোছাৰ উদ্দেশ্যে সাত দিনৰ বাবে আৰক্ষীৰ জিম্মালৈ প্ৰেৰণ কৰা হৈছে।

লোকসভাৰ ভিতৰত আটক হোৱা সাগৰ শৰ্মা আৰু ডি মনোৰঞ্জন আৰু সংসদৰ বাহিৰত গ্ৰেপ্তাৰ হোৱা নীলম দেৱী আৰু আমোল শিণ্ডেক বিতংভাৱে সোধা-পোছা কৰিবলগীয়া হৈছে বুলি তদন্তকাৰীয়ে উল্লেখ কৰিছে।

উল্লেখ্য যে, কালি বিয়লি নিৰাপত্তা ভংগৰ বাবে ৫জন লোকক গ্ৰেপ্তাৰ কৰা হয়। লক্ষ্ণৌৰ সাগৰ শৰ্মা আৰু মাইচুৰুৰ ডি মনোৰঞ্জনে সংসদৰ ভিতৰত কন্দুৱা গেছ উলিয়াই আতংকৰ সৃষ্টি কৰিছিল।

এনে আকস্মিক কাণ্ডৰ পিছত দুয়োজনকে কেইগৰাকীমান সাংসদ আৰু নিৰাপত্তাৰক্ষীয়ে আটক কৰিছিল। আনহাতে দৰ্শনাৰ্থীৰ পাছ ল’ব নোৱাৰি নীলম দেৱী আৰু আমোল শিণ্ডেই সংসদৰ বাহিৰত প্ৰতিবাদ কৰিছিল।

চাৰিওজনৰ বিৰুদ্ধে সন্ত্ৰাসবাদ বিৰোধী আইনৰ অধীনত অভিযোগ উত্থাপন কৰা হৈছে। আজি আদালতত আৰক্ষীয়ে এই কাণ্ডৰ সন্ত্ৰাসবাদী আক্ৰমণৰ সৈতে মিল থকা বুলি দাবী কৰে।

এই কাণ্ডৰ উদ্দেশ্য কি আছিল তথা এই সমগ্ৰ কাণ্ডৰ সৈতে কোনো সন্ত্ৰাসবাদী সংগঠন জড়িত নেকি তদন্ত কৰিব লাগিব বুলি আদালতত আৰক্ষীয়ে উল্লেখ কৰে।