বংগত ধৰা পৰিছে ক’ভিদৰ বি এফ.৭ সংক্ৰমিত চাৰি ৰোগী: তৎপৰ প্ৰশাসন

ক’ভিদৰ পুনৰ সংক্ৰমণৰ আশংকাই উদ্বিগ্ন কৰি ৰখাৰ সময়তে এইবাৰ পশ্চিম বংগত ধৰা পৰিছে চীনত শেহতীয়াকৈ বৃদ্ধি পোৱা অ’মিক্ৰনৰ চাবভেৰিয়েণ্ট বি এফ.৭ৰ সংক্ৰমিত চাৰিগৰাকী ৰোগী। পশ্চিম বংগৰ স্বাস্থ্য বিভাগে সদৰী কৰিছে এই তথ্য।

শেহতীয়াকৈ আমেৰিকাৰ পৰা উভতি অহা ব্যক্তি চাৰিগৰাকীৰ জিন’ম ছিকুৱেন্সিঙত ক’ৰ’ণা ভাইৰাছৰ এই নতুন ভেৰিয়েণ্টত আক্ৰান্ত হোৱাটো নিশ্চিত কৰা হৈছে বুলি স্বাস্থ্য বিভাগে কয়। অৱশ্যে চাৰিওগৰাকী ৰোগীৰ অৱস্থা বৰ্তমান সুস্থিৰ বুলি এগৰাকী বিষয়াই লগতে সদৰী কৰিছে।

বিষয়াগৰাকীয়ে জানিবলৈ দিয়া মতে, চাৰিগৰাকী লোকৰ ভিতৰত তিনিগৰাকী নাদিয়া জিলাৰ একেটা পৰিয়ালৰ স্থানীয় লোক। আনহাতে আন গৰাকী লোক মূলত: বিহাৰৰ যদিও বৰ্তমান কলকাতাত বাস কৰে বুলি বিষয়াগৰাকীয়ে উল্লেখ কৰে।

ৰাজ্যৰ স্বাস্থ্য বিভাগে এই চাৰিগৰাকী ক’ভিদ আক্ৰান্ত ৰোগীৰ সংস্পৰ্শলৈ অহা মুঠ ৩৩ গৰাকী লোকক চিনাক্ত কৰা বুলি জানিবলৈ দিছে। আটাইকেইগৰাকী লোকেই সম্প্ৰতি সুস্থ আৰু বিভাগে তেওঁলোকক নিৰীক্ষণ কৰি আছে বুলিও স্বাস্থ্য বিষয়া গৰাকীয়ে লগতে কয়।

তেওঁ সদৰী কৰা মতে, বিগত মাহৰ পৰা বহিঃৰাজ্যৰ পৰা কলকাতা বিমানবন্দৰত উপস্থিত হোৱা সকলো লোকৰ নমুনা সংগ্ৰহ কৰা হৈছিল।

যোৱা সপ্তাহত কলকাতা বিমানবন্দৰত এগৰাকী বিদেশী নাগৰিককে ধৰি দুগৰাকী লোকৰ দেহত ক’ভিদ সংক্ৰমণ ধৰা পৰিছিল। পিছত তেওঁলোকৰ জিনম ছিকুৱেন্সিঙত অ’মিক্ৰনৰ চাবভেৰিয়েণ্ট বি এফ.৭ৰ দ্বাৰা আক্ৰান্ত বুলি নিশ্চিত কৰা হৈছিল।