২৪ ঘণ্টাৰ ভিতৰত চাৰিজন দুৰ্ধৰ্ষ ডকাইতক গ্ৰেপ্তাৰ ধুবুৰী আৰক্ষীৰ
বিগত কেইবামাহ ধৰি সাধাৰণ জনতাৰ মাজত সন্ত্ৰাসৰ সৃষ্টি কৰা চাৰিজন দুৰ্ধৰ্ষ ডকাইতক অৱশেষত ধুবুৰী আৰক্ষীয়ে গ্ৰেপ্তাৰ কৰিবলৈ সক্ষম হয়।
জিলাখনত সংঘটিত কেইবাটাও ডকাইতি কাণ্ডত এই ডকাইত কেইজন জৰিত আছিল বুলি আৰক্ষীয়ে জনায়।
গ্ৰেপ্তাৰ হোৱা ডকাইত কেইজন ক্ৰমে মায়াৰ চৰৰ আছাদ মণ্ডল, বয়জাৰ আলগাৰ পাৰ্ট তিনিৰ চৰবেছ আলী আৰু তমাকুবাৰী পাৰ্ট একৰ ৰফিজুল হক বুলি চিনাক্ত কৰা হৈছে।
আনহাতে এতিয়াও এজনৰ পৰিচয় সম্পূৰ্ণৰূপে জানিব পৰা হোৱা নাই।
ধুবুৰী আৰক্ষী অধীক্ষক আনন্দ মিশ্ৰাই এতিয়ালৈকে নাককাটা সহিতে চাৰিজন দুৰ্ধৰ্ষ ডকাইতক আৰক্ষীৰ এটা বিশেষ দলে গ্ৰেপ্তাৰ কৰিবলৈ সক্ষম হোৱা বুলি জানিবলৈ দিয়ে।
উল্লেখ্য যে, কিছু মাহ পূৰ্বে নাককাটাৰ সহযোগী শ্বাহ আলম আৰক্ষীৰ সৈতে সংঘৰ্ষত নিহত হৈছিল বুলিও আৰক্ষী অধীক্ষক গৰাকীয়ে উল্লেখ কৰে।
আনহাতে ধুবুৰী আৰক্ষীৰ আন এটা সফল অভিযানত চাপৰ অঞ্চলৰ পৰা তিনিজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয়।
ইয়াৰ উপৰি তামৰহাট আৰক্ষী থানাৰ অন্তৰ্গত অঞ্চলৰ পৰা ২৫টা চোৰাং গৰু আৰু চালকিচা আৰক্ষী চকীৰ অন্তৰ্গত চুৱাপাৰা পাৰ্ট তিনিৰ গাঁৱৰ পৰা বৃহৎ পৰিমাণৰ ৰাজহুৱা বিতৰণ ব্যৱস্থাৰ চাউলো জব্দ কৰে।