কৰ’না ভাইৰাছ: তেজপুৰ কেন্দ্ৰীয় কাৰাগাৰৰ পৰা মুকলি কৰি দিয়া হ’ল ৪১জন কাৰাবন্দীক
কৰ’না ভাইৰাছৰ আতংকৰ মাজতে তেজপুৰ কেন্দ্ৰীয় কাৰাগাৰ কৰ্তৃপক্ষই শনিবাৰে ৪১জন কাৰাবন্দীক মুকলি কৰি দিয়ে।
তেজপুৰ কেন্দ্ৰীয় কাৰাগাৰৰ জেইল অধীক্ষক মৃন্ময় ডাউকাই জানিবলৈ দিয়ে যে উচ্চতম ন্যায়ালয়ে অলপতে দেশৰ কাৰাগাৰ সমূহত থকা অতিৰিক্ত কাৰাবন্দীসকলক মুকলি কৰিবলৈ নিৰ্দেশ দিছিল।
‘’সৰ্বোচ্চ ন্যায়ালয়খনৰ নিৰ্দেশ অনুসৰি, বিভিন্ন অপৰাধৰ অভিযোগত কাৰাবন্দী হৈ থকা ৪১জনক তেজপুৰ আৰক্ষীক গতাই দিয়া হয়। অৱশ্যে, ৪১জন কাৰাবন্দীৰ ভিতৰত ২৩ জন কাৰাবন্দীক স্বাস্থ্য বিভাগ আৰু তেজপুৰ আৰক্ষীৰ নিৰীক্ষণৰ অধীনত আইছ’লেশ্যনত ৰখা হ’ব,’’-ডাউকাই জনায়।
ইয়াৰ মাজতে চৰকাৰে অঞ্চলটোত COVID19 ৰোগীৰ বাবে বৃহৎ মেন্টেল হেলথ ইনষ্টিটিউটৰ প্ৰস্তুতি চলাইছে।
সোমবাৰে উচ্চতম ন্যায়ালয়ে সকলো ৰাজ্য তথা কেন্দ্ৰীয় শাসিত অঞ্চলক COVID19ৰ সংক্ৰমণ প্ৰতিৰোধত সহায় কৰিবলৈ কাৰাগাৰসমূহৰ ভিৰ ৰোধ কৰিবলৈ কোনবোৰ কাৰাবন্দীক ৪ৰপৰা ৬ সপ্তাহলৈ পেৰ’লত মুকলি কৰি দিব পাৰি সেয়া নিৰ্দ্ধাৰণ কৰাৰ বাবে সংশ্লিষ্ট উচ্চ পৰ্যায়ৰ কমিটি গঠনৰ নিৰ্দেশ দিছিল।
মুখ্য ন্যায়াধীশ এছ এ ববডেৰ নেতৃত্বত ন্যায়াধীশ এল নাগেশ্বৰ ৰাও আৰু ন্যায়াধীশ সূৰ্যকান্তক লৈ গঠিত এখন বিচাৰপীঠে ৰাজ্য চৰকাৰ তথা কেন্দ্ৰীয় শাসিত কৰ্তৃপক্ষক ৭ বছৰ পৰ্যন্ত কাৰবাস খাটিবলগীয়া অভিযুক্ত বা অপৰাধৰ অভিযোগ থকাসকলক পেৰ’লত মুকলি কৰি দিয়াৰ নিৰ্দেশ দিছিল।
উচ্চতম ন্যায়ালয়ে কৈছিল: ‘’আমি সেয়েহে, নিৰ্দেশ দিও যে প্ৰতিখন ৰাজ্যই গৃহ সচিব তথা অধ্যক্ষ, ৰাজ্যিক আইন সেৱা কৰ্তৃপক্ষক লৈ এথন উচ্চ পৰ্যায়ৰ কমিটি গঠন কৰি কাৰাবন্দীসকলৰ (মুকলি কৰি দিবলগীয়া) শ্ৰেণী নিৰ্দ্ধাৰণ কৰক।‘’