অব্যাহত ক’ৰ’না সংহাৰ : বৃহস্পতিবাৰে কেইবা হাজাৰ লোকৰ মৃত্যু আমেৰিকাত
ক’ৰ’না ভাইৰাছৰ সংহাৰে সম্পূৰ্ণৰূপে দিশহাৰা কৰি তুলিছে ছুপাৰপাৱাৰ আমেৰিকাক। দেশখনত ক’ৰ’না সংক্ৰমণ তথা মৃত্যুৰ সংখ্যা নিয়ন্ত্ৰণৰ বাহিৰত গুছি যোৱা পৰিলক্ষিত হৈছে।
ক’ৰ’নাৰ সংহাৰ ইমানেই ভয়ংকৰ যে দেশখনত এই পৰ্যন্ত ৩২,৯১৭ গৰাকী লোকে প্ৰাণ হেৰুৱাইছে।
ইফালে যোৱা ২৪ ঘণ্টাত দেশখনত ক’ৰ’নাৰ ফলত ৪,৪৯১ গৰাকী লোকে প্ৰাণ হেৰুওৱা খবৰে আমেৰিকাৰ লগতে সমগ্ৰ বিশ্ববাসীক স্তম্ভিত কৰি তুলিছে।
জনছ হফিন্স য়ুনিভাৰ্চিটিৰ ক’ৰ’না ভাইৰাছ চেণ্টাৰে প্ৰকাশ কৰা তথ্য অনুসৰি এটা দিনত মৃত্যু হোৱা সংখ্যাৰ ক্ষেত্ৰত এই পৰ্যন্ত এইটোৱে সৰ্বাধিক সংখ্যাৰ ঘটনা।
উল্লেখ্য যে সমগ্ৰ বিশ্বতে ভয়াবহ ৰূপ ধাৰণ কৰা ক’ৰ’নাত সৰ্বাধিক আমেৰিকাৰ ৬,৬৭,৮০০ গৰাকী লোক আক্ৰান্ত হৈছে। আনহাতে মৃত্যু হৈছে ৩২,৯১৭ গৰাকী লোকৰ।
চীনৰ য়ুহান চহৰত আৰম্ভ হোৱা এই ভাইৰাছবিধে সমগ্ৰ বিশ্বলৈ সম্প্ৰসাৰণ ঘটাত হাহাকাৰ পৰিস্থিতিৰ সৃষ্টি হৈছে। ক’ৰ’নাৰ ফলত বিশ্বত এতিয়ালৈ ১,৪৪,২২১ গৰাকী লোকৰ মৃত্যু হোৱাৰ বিপৰীতে আক্ৰান্ত হৈছে ২১ লাখৰো অধিক লোক।