পশ্চিম বংগত প্ৰকৃতিৰ ৰুদ্ৰ ৰূপঃ ৫ জনৰ মৃত্যু, তিনি শতাধিক লোক আহত

দেওবাৰে দেশৰ বিভিন্ন প্ৰান্তত দেখিবলৈ পোৱা গ’ল প্ৰকৃতিৰ তাণ্ডৱ। প্ৰবল শিলাবৃষ্টিৰ লগতে ধুমুহাই তাণ্ডৱৰ সৃষ্ট কৰিলে কিছু কিছু অঞ্চলত। পশ্চিম বংগত সংহাৰী ৰূপ ধাৰণ কৰি ধুমুহা-বৃষ্টিপাতে।

ৰাজ্যখনৰ জলপাইগুৰিত এনে প্ৰচণ্ড ধুমুহা-বৃষ্টিপাতৰ ফলত ৫ জন লোকৰ মৃত্যু হোৱাৰ লগতে ৩০০ৰো অধিক লোক আহত হয়। প্ৰকৃতিৰ এনে সংহাৰী ৰূপৰ ফলত অঞ্চলটোৰ আঠ শতাধিকবাসগৃ্হৰো বিস্তৰ ক্ষতিসাধন হয়।

এনে পৰিস্থিতিৰ পিছতে মুখ্যমন্ত্ৰী মমতা বেনাৰ্জীয়ে দেওবাৰে নিশা জলপাইগুৰিত ভ্ৰমণ কৰে আৰু জলপাইগুৰি ছুপাৰ স্পেচিয়েলিটি হস্পিতাল পৰিদৰ্শন কৰি আহত লোকসকলক সাক্ষাৎ কৰে।

পৰিস্থিতিৰ বুজ লৈ মুখ্যমন্ত্ৰীগৰাকীয়ে ভুক্তভোগীৰ পৰিয়ালক সাক্ষাৎ কৰাৰ লগতে ৰাজ্য চৰকাৰ ক্ষতিগ্ৰস্ত লোকসকলক যথাসাধ্য সকলো সহায়-সহযোগিতা আগবঢ়াব বুলিও প্ৰতিশ্ৰুতি দিয়ে।

অৱশ্যে নিৰ্বাচনী আচৰণ বিধিৰ দোহাই দি ক্ষতিগ্ৰস্ত লোকসকলৰ বাবে ক্ষতিপূৰণ ঘোষণাৰ পৰা আঁতৰি থাকে মমতা বেনাৰ্জী। প্ৰধানমন্ত্ৰী নৰেন্দ্ৰ মোদীয়েও ধুমুহাত প্ৰাণ হেৰুওৱা লোকসকলৰ প্ৰতি শোক প্ৰকাশ কৰে।

ইফালে স্থানীয় প্ৰশাসনে সদৰী কৰা মতে পৰিস্থিতিৰ সৈতে মোকাবিলা কৰিবলৈ ৰাজ ভৱনত এটা জৰুৰীকালীন কোষো মুকলি কৰা হৈছে। এক চৰকাৰী বিবৃতি অনুসৰি ৰাজ্যখনৰ ৰাজ্যপালগৰাকীয়ে দিল্লীৰ দুৰ্যোগ ব্যৱস্থাপনা কৰ্তৃপক্ষৰ সৈতে যোগাযোগ কৰিছে।