নামতিত পালচাৰ বাইকে প্ৰাণ ললে দুজন ব্যক্তিৰ; নিশা উত্তপ্ত পৰিস্থিতি

শনিবাৰে সন্ধিয়া এক ভংয়কৰ পথ দুৰ্ঘটনাই জোকাৰি গ’ল শিৱসাগৰৰ নামতিত।  নামতিৰ ধোদৰ আলিত এখন পালচাৰ বাইকে মহতিয়ালে দুটা পৰিয়ালৰ পাঁচজনকৈ লোকক।

দুৰ্ঘটনাটোত গুৰুতৰভাৱে আহত হয় পাঁচজনকৈ লোক। আহত লোক কেইজনক ততাতৈয়াকৈ শিৱসাগৰ অসামৰিক চিকিৎসালয়লা নিয়া হয় যদিও চিকিৎসকে আটাইকেইজনক ডিব্ৰুগড় মেডিকেল কলেজলৈ প্ৰেৰণ কৰে।

কিন্তু ডিব্ৰুগড় মেডিকেল কলেজত ইয়াৰে দুগৰাকী ব্যক্তিৰ মৃত্যু হয়। মৃত ব্যক্তি দুগৰাকী হ’ল আলহাজ মৌলানা দাউদ হুছেইন আৰু মাতু বেগম।

আনহাতে দুৰ্ঘটনাত গুৰতৰভাৱে আহত আন তিনিজন ব্যক্তিৰ অৱস্থা এতিয়াও সংকটজনক।

পথ দুর্ঘটনাক কেন্দ্র কৰি নামতি ধোদৰ আলিত ৰাতি এক উত্তপ্ত পৰিস্থিতিৰ সৃষ্টি হয়। উত্তেজিত কেইবা শতাধিক ৰাইজে ধোদৰ আলি অৱৰোধ কৰি প্রতিবাদ সাব্যস্ত কৰে ।

ইপিনে, উদণ্ড বাইক চালক জন চামগুৰি আদৰ্শ গাঁৱৰ মাইনা গগৈ বুলি চিনাক্ত কৰা হৈছে।

শিৱসাগৰৰ পৰা নিজ ঘৰৰ দিশে আহিছিল বাইক আৰোহী মাইনা গগৈ। এগৰাকী কিশোৰী আৰু এজন যুৱকসহ তিনি গৰাকী ব্যক্তি বাইকখনত উঠি আহিছিল।

উল্লেখ্য যে আমগুৰি-নামতি সংযোগী ধোদৰ আলিত ইয়াৰ পূৰ্বে কেইবাটাও উদণ্ড বাইক চালকৰ দ্বাৰা  সংঘটিত দুৰ্ঘটনাত বহু কেইজন লোকে প্ৰাণ হেৰুৱাবলগীয়া হৈছে।

পথটোত উদণ্ড বাইক চালকে তীব্ৰ বেগত বাইক চলাই সন্ত্ৰাসৰ সৃষ্টি কৰাৰ লগতে এচাম ব্যক্তিয়ে ৰাস্তাৰ কাষত নিৰ্জন ঠাইত গাড়ী-বাইক ৰখাই সুৰাপান কৰাৰ লগতে বহু অসামাজিক কাৰ্যত লিপ্ত হোৱা দেখা যায়।

এই ক্ষেত্ৰত আমগুৰি কিম্বা নামতি থানাৰ আৰক্ষীয়ে কোনো পদক্ষেপ গ্ৰহণ কৰা দেখা পোৱা নাই বুলি জানিবলৈ দিয়ে স্থানীয় ৰাইজে।