ইউক্ৰেইনৰ ৰে’ল ষ্টেচনত ৰাছিয়াৰ ৰকেট আক্ৰমণ: ৫ শিশুসহ ৫০ জনতকৈও অধিক লোক নিহত

পূব ইউক্ৰেইনৰ ক্ৰামাটৰ্স্ক চহৰত শুকুৰবাৰে ৰাছিয়াৰ ভয়ংকৰ ৰকেট আক্ৰমণত পাঁচ শিশুসহ কমেও ৫০ জন লোক নিহত হয়। স্থানীয় প্ৰশাসনে এই ভয়াৱহ আক্ৰমণৰ কথা ৰাজহুৱা কৰিছে।

চহৰখনৰ সাধাৰণ নাগৰিকক দেশৰ সুৰক্ষিত স্থানলৈ স্থানান্তৰ কৰিবলৈ চেষ্টা কৰাৰ মুহূৰ্ততে এই আক্ৰমণ হয় বুলি জানিব পৰা গৈছে।

ডনেটস্কৰ আঞ্চলিক গভৰ্ণৰৰ মতে, ৰাছিয়াৰ আক্ৰমণৰ পৰা ৰক্ষা পাবলৈ চহৰ এৰিবলৈ চেষ্টা কৰা হাজাৰ হাজাৰ লোক সেই সময়ত ষ্টেচনত আছিল।

ইউক্ৰেইনৰ ৰাজ্যিক ৰে’ল কোম্পানীৰ মুৰব্বীয়ে জনোৱা অনুসৰি অসামৰিক লোকসকলক স্থানান্তৰ কৰিবলৈ ব্যৱহৃত ৰেল ষ্টেচনটোত ৰাছিয়াই দুটাকৈ ৰকেট আক্ৰমণ চলায়।

আনহাতে এই আক্ৰমণৰ পিছতে ৰাছিয়াক সীমাহীন দানৱ আখ্যা দিয়ে ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে। তেওঁ কয়, “ৰাছিয়াই অসামৰিক নাগৰিকক নিন্দনীয়ভাৱে হত্যা কৰিছে। এইয়া এক দানৱীয় কাৰ্য, যাৰ কোনো সীমা নাই।”

ৰাছিয়াৰ এই কাৰ্যৰ বাবে যদি কোনো শাস্তিমূলক ব্যৱস্থা গ্ৰহণ কৰা নহয়, তেতিয়া ই কেতিয়াও বন্ধ নহয় বুলিও মন্তব্য কৰে জেলেনস্কিয়ে।