৫০ বছৰৰ পিচত সহপাঠীৰ ওপৰত প্রতিশোধ!

কেৰালাৰ কাছাৰাগোড জিলাৰ এখন বিদ্যালয়ত ২ জুন তাৰিখে আয়োজন কৰা হৈছিল পুৰণি ছাত্ৰ-ছাত্ৰীৰ পুনৰ মিলন অনুষ্ঠান। অনুষ্ঠানটোত উপস্থিত আছিল বালকৃষ্ণন, মেথিউ বলিয়াপ্পালাক্কাল আৰু ৱজে বাবু । তেওঁলোকে ৫০ বছৰ পূৰ্বে একে শ্ৰেণীত পঢ়িছিল।

চতুৰ্থ শ্ৰেণীত থাকোতেই বাবুৱে বালকৃষ্ণনক মাৰিছিল বুলি অভিযোগ আছিল। সেই ঘটনাৰ ৫০ বছৰ পাছতো বালকৃষ্ণনে সেই খং আৰু অপমান মনত পুহি ৰাখিছিল।

পুনৰ মিলনত বাবুক দেখা পাই বালকৃষ্ণনে হঠাতে তেওঁৰ ওপৰত আক্ৰমণ কৰে। অভিযোগ অনুসৰি, বালকৃষ্ণনে বাবুৰ মুখ আৰু ডিঙিত শিলেৰে প্ৰহাৰ কৰে। এই আক্ৰমণত বাবু গুৰুতৰভাৱে আঘাতপ্ৰাপ্ত হয়।

ঘটনাটোৰ পিছতে আৰক্ষীয়ে বালকৃষ্ণনক গ্ৰেপ্তাৰ কৰে। তদন্তৰ সময়ত মেথিউ বলিয়াপ্পালাক্কালৰো এই ঘটনাত জড়িত থাকিব পাৰে বুলি সন্দেহত তেওঁকো গ্ৰেপ্তাৰ কৰা হয়। ৫০ বছৰ আগৰ এজন সহপাঠীয়ে কৰা মানসিক আঘাতেৰে জন্ম হোৱা দুখ-ক্ষোভ শেষত এক ভয়ংকৰ ঘটনাত পৰিণত হ’ব বুলি কল্পনাতীত আছিল।