কোকৰাঝাৰত চাহ বাগিচাৰ কৰ্মীসকলক আৰ্থিক মঞ্জুৰী পত্ৰ বিতৰণ জিলা প্ৰশাসনৰ

প্ৰধানমন্ত্ৰী নৰেন্দ্ৰ মোদীয়ে ঘোষণা কৰা নগদ বিহীন লেন- দেন ব্যৱস্থা তথা ঘোষিত বিমুদ্ৰাকৰণৰ সময়ত একাউণ্ট খোলা প্ৰত্যক্ষ চাহ বাগিচাৰ কৰ্মী সমূহৰ বেংক একাউণ্টত পাঁচ হেজাৰকৈ  আৰ্থিক অনুদানৰ মনঞ্জুৰী পত্ৰ সমূহ আনুষ্ঠানিকভাৱে বিতৰণ কৰে কোকৰাঝাৰ জিলা প্ৰশাসনে।

সোমবাৰে কোকৰাঝাৰ মাগুৰমাৰী চাহ বাগিচাৰ খেল পথাৰত আয়োজিত আৰ্থিক মনঞ্জুৰী পত্ৰ বিতৰণ সভাত উপস্থিত থাকি বি টি চিৰ কাৰ্য্যবাহী সদস্য ৰাজীৱ কুমাৰ ব্ৰহ্মই কোকৰাঝাৰৰ চাহ বাগিচাৰ মুঠ ১৯৫০ জন চাহ বাগিচাৰ কৰ্মীক উক্ত আৰ্থিক মনঞ্জুৰী পত্ৰ সমূহ বিতৰণ কৰে।

উল্লেখযোগ্য যে উল্লেখিত পাঁচ হেজাৰৰ আধা ধন অৰ্থাৎ দুই হেজাৰ পাঁচশ টকা প্ৰথম কিস্তি হিচাপে বিমুদ্ৰাকৰণৰ সময়ত বেংক একাউণ্ট খোলা চাহ বাগিচাৰ কৰ্মী সকলে অহা ১৬ জানুৱাৰীৰ ভিতৰত বেংকৰ জৰিয়তে আদায় কৰিব পাৰিব।

একেৰাহে ছমাহ বেংক একাউণ্টৰ জৰিয়তে মজুৰি গ্ৰহণ কৰা চাহ বাগিচাৰ কৰ্মীসকলে একাউণ্টৰ জৰিয়তে পুনৰ দুই হেজাৰ পাঁচশ টকা পাবলৈ সক্ষম হ’ব। তদুপৰি বেংক একাউণ্ট খোলা সকলো হিতাধিকাৰীয়ে কেন্দ্ৰীয় আৰু ৰাজ্য চৰকাৰৰ দ্বাৰা গ্ৰহণ কৰা আঁচনি সমূহৰ সুফল ভৱিষ্যতে লাভ কৰিব বুলি সজাগতা সভাৰ জৰিয়তে চাহ বাগিচাৰ কৰ্মী সকললৈ উদ্দেশ্য কৰি বক্তব্য ৰাখে কোকৰাঝাৰ জিলা প্ৰশাসনৰ কৰ্তৃপক্ষ তথা বি টি চি ই এম ৰাজীৱ কুমাৰ ব্ৰহ্ম, জিলা উপায়ুক্ত নিৰঞ্জন বৰুৱা আৰু এছ বি আই , ইউকো বেংকৰ বিষয়াসকলে।