কোকৰাঝাৰত ৫৫ বছৰীয়া ব্যক্তিৰ এগৰাকী শিশু কন্যাক যৌন নিৰ্যাতন : পলাতক অভিযুক্ত

কোকৰাঝাৰত পুনৰ শিশু কন্যাক যৌন নিৰ্যাতন চলোৱা এক ঘটনা সংঘটিত হৈছে।

কোকৰাঝাৰ জিলাৰ বিছমুৰী আৰক্ষী চকীৰ অন্তৰ্গত এখন গাঁবত ৫৫ বছৰীয়া এগৰাকী ব্যক্তিয়ে নবছৰীয়া এগৰাকী ছাত্ৰীক ফুচলাই আৰু ভয় ভাবুকিৰে যৌন নিৰ্যাতন চলাই অহাৰ এক ঘটনা পলমকৈ পোহৰলৈ আহিছে |

অভিযোগ অনুসৰি অভিযুক্ত ৰঘুনাথ নাৰ্জাৰী নামৰ ৫৫ বছৰীয়া ব্যক্তিজনে কন্যা শিশুগৰাকীক নানা প্ৰলোভন আৰু ভয় ভাবুকিৰে একাধিকবাৰ যৌন নিৰ্যাতন চলাইছিল।

ঘটনা সন্দৰ্ভত শিশুটিৰ পৰিয়ালৰ লোকে সকলো বিৱৰি কোৱাৰ পিছত কালি বিছমুৰী আঞ্চলিক এবছুৰ সহযোগত বিছমুৰী আৰক্ষী চকীত এক গোচৰ ৰুজু কৰে।

ইতিমধ্যে গোচৰ নং 387/21 U/S 376AB P/W Sec 4B POSCO Act 2005ৰ অধীনত গোচৰ ৰুজু কৰিলেও অভিযুক্ত লোকজন পলাতক হৈ থকাত আৰক্ষীয়ে গ্ৰেপ্তাৰ কৰিবলৈ সক্ষম হোৱা নাই।

আৰক্ষীয়ে অভিযুক্তক গ্ৰেপ্তাৰৰ বাবে অভিযান অব্যাহত ৰাখিছে বুলি জানিব পৰা গৈছে।

ইফালে এই বিছমুৰীৰ অমানৱীয় ঘটনাক কঠোৰ ভাষাৰে নিন্দা কৰি এবছুৰ কোকৰাঝাৰ জিলা সমিতিৰ সভাপতি কৃপেশ দৈমাৰীয়ে শীঘ্ৰেই আৰক্ষী প্ৰশাসনক দোষীক গ্ৰেপ্তাৰ কৰাৰ দাবী তুলিছে।

কোকৰাঝাৰ শিশু কল্যাণ কমিটিও কোকৰাঝাৰ জিলাত দিনক দিনে বৃদ্ধি পাই অহা শিশু নিৰ্যাতনৰ ঘটনাক কঠোৰ ব্যৱস্থা গ্ৰহণ কৰি ৰোধ কৰিবলৈ প্ৰশাসনৰ ওচৰত দাবী জনাইছে।