ইউক্ৰেইনৰ বিদ্যালয়ত ৰাছিয়াৰ বোমা বৰ্ষণ: ৬০ জনৰো অধিক লোকৰ মৃত্যুৰ আশংকা

তিনিমাহ ধৰি চলি থকা ৰাছিয়া-ইউক্ৰেইন যুদ্ধৰ দাবানলৰ মাজতে আজি ইউক্ৰেইনৰ পূব অঞ্চল লুহানস্কৰ এখন বিদ্যালয়ত ৰাছিয়াই বোমা বৰ্ষণ কৰাৰ অভিযোগ কৰিছে লুহানস্কৰ স্থানীয় গভৰ্ণৰে।

এই বিস্ফোৰণত প্ৰায় ৬০ জন লোক নিহত হোৱাৰ আশংকা কৰা হৈছে।

গভৰ্ণৰ চেৰহি গাইদাই কয় যে ৰাছিয়াৰ বাহিনীয়ে বিলোহোৰিভকাৰ বিদ্যালয়খনত এটা বোমা নিক্ষেপ কৰিছিল। উক্ত বিদ্যালয়খনত প্ৰায় ৯০ জন লোকে আশ্ৰয় লৈ আছিল বুলিও তেখেতে উল্লেখ কৰে।

এই বোমা বিস্ফোৰণৰ ফলত বিদ্যালয় ভৱনটো জুয়ে আৱৰি ধৰে আৰু ধ্বংসস্তূপত পৰিণত হয় বুলি এক বিবৃতিত তেওঁ কয়।

গাইদাই টেলিগ্ৰামৰ এটা পোষ্টত কয়, “প্ৰায় চাৰি ঘণ্টাৰ পিছত জুই নুমুৱাব পৰা সম্ভৱ হৈছিল। ধ্বংসস্তূপৰ মাজত দুজন লোকৰ মৃতদেহ পোৱা গৈছিল।”

“ধ্বংসস্তূপৰ পৰা ৩০ জন লোকক উলিয়াই অনা হৈছিল। অট্টালিকাৰ ধ্বংসস্তূপৰ তলত ষাঠিজনতৈ অধিক লোকৰ মৃত্যু হোৱাৰ সম্ভাৱনা আছে।”- গভৰ্ণৰ গাইদাই লগতে কয়।