তামুলপুৰৰ কুম্ভীৰঝাৰত ৬২ সংখ্যক চড়ক পূজা উদযাপন: প্ৰতিকূল বতৰ নেওচি সমবেত সহস্ৰাধিক লোক

এক পৰম্পৰাগত অথচ ভয়ানক তথা শিঁহৰণকাৰী পূজা৷ যি দৃশ্য দেখিলে গাৰ নোম সিঁয়ৰি উঠিব আপোনাৰ মোৰ সকলোৰে৷ স্বাভাৱিকতেই প্ৰশ্ন হ’ব, এইয়া তন্ত্ৰ মন্ত্ৰ, অলৌকিকতা নে বিজ্ঞান?

ৰাইজে বিশ্বাস কৰে এইয়া তন্ত্ৰ মন্ত্ৰৰ ফল। এজন জীৱন্ত মানুহৰ পিঠিত বিন্ধাই দিয়া হৈছে দুটাকৈ প্ৰকাণ্ড লোৰ বৰশী।ওলোৱা নাই এটোপালো তেজ।

বৰশীৰে পিঠিত বিন্ধাই ওলোমাই দিয়া হৈছে এটি খুটাত ওলমি থকা বাঁহেৰে নিৰ্মিত ঢেঁকীত আৰু আৰু খুটাত ওলোমাই শূণ্যতে ঘূৰোৱা হৈছে মানুহজনক।

ৰাজ্যখনত বসবাস কৰি থকা বিশেষকৈ বঙালী সম্প্ৰদায়ৰ লোক সকলে চ’ত আৰু বহাগ মাহৰ সংক্ৰান্তিৰ দিনা প্ৰতিবছৰে পালন কৰে এই চড়ক পুজা।

বৃহস্পতিবাৰে অৰ্থাৎ সংক্ৰান্তিৰ দিনা ৰাজ্যৰ বিভিন্ন ঠাইৰ লগতে নৱগঠিত তামুলপুৰ জিলাৰ নাগ্ৰীজুলিৰ কুম্ভীৰঝাৰত দেখা গ’ল এই শিঁহৰণকাৰী দৃশ্য৷

পৰম্পৰাগত নীতি নিয়ম অনুসৰি পুজা সম্পন্ন কৰাৰ পিচত এইদৰে বৰশীৰে পিঠিত বিন্ধাই বাঁহৰ ঢেঁকীত ওলোমাই মানুহজনক ঘূৰোৱা আৰু গাৰ নোম সিঁয়ৰি উঠা দৃশ্য চাবলৈ সমবেত হ’ল কেইবা সহস্ৰাধিক লোক৷

এনেদৰে কেইবাটাও অদ্ভুত খেল পৰিৱেশন কৰি উপস্থিত সহস্ৰাধিক ৰাইজৰ দৃষ্টি আকৰ্ষণ কৰে এই চড়ক পুজাই।

উল্লেখ্য যে এইবাৰ গাঁওখনত ৬২ সংখ্যক চড়ক পুজা উদযাপন কৰা হয়। প্ৰতিকূল বাতৰকো নেওচি নাগ্ৰীজুলিৰ কুম্ভীঝাৰত সমবেত হয় সহস্ৰাধিক লোক।