লাডাখত শোকাৱহ দুৰ্ঘটনা: সেনা কঢ়িয়াই নিয়া বাহন বাগৰি পৰিল নদীত, সাত জোৱানৰ মৃত্যু
লাডাখত সংঘটিত শোকাৱহ দুৰ্ঘটনাত প্ৰাণ হেৰুৱাইছে ভাৰতীয় সেনাৰ সাতজনকৈ জোৱানে। ভাৰতীয় সেনাই প্ৰকাশ কৰা মতে ভাৰতীয় সেনা কঢ়িয়াই নিয়া এখন বাহন পথৰ পৰা বাগৰি লাডাখৰ শ্ব্যোক নদীত বাগৰি পৰাৰ ফলত এই শোকাৱহ দুৰ্ঘটনা সংঘটিত হয়।
সেনাৰ এগৰাকী মুখপাত্ৰই জানিবলৈ দিয়া মতে পাৰ্টাপুৰৰ ট্ৰেঞ্জিট কেম্পৰ পৰা চাব ছেক্টৰ হানিফ অভিমুখী বাহনখনত ২৬ গৰাকী সেনা জোৱানৰ এটা দল আছিল।
তেওঁ জানিবলৈ দিয়া মতে, থোইজৰ পৰা প্ৰায় ২৫ কিলোমিটাৰ দূৰত পুৱা প্ৰায় ৯ বজাত বাহনখন পথৰ পৰা পিছলি প্ৰায় ৬০ ফুট তলত থকা শ্ব্যোক নদীত বাগৰি পৰে।
এই দুৰ্ঘটনাত বাহনখনত থকা আটাইকেইজন সেনাই কম-বেছি পৰিমাণে আঘাতপ্ৰাপ্ত হয়। আনহাতে এই দুৰ্ঘটনাৰ খবৰ পোৱাৰ লগে লগে সেনাৰ উদ্ধাৰকাৰী দল ঘটনাস্থলীত উপস্থিত হৈ দ্ৰুতগতিত উদ্ধাৰ অভিযান সম্পন্ন কৰে।
আঘাতপ্ৰাপ্ত সৈনিকসকলক লগে লগে পাৰ্টাপুৰৰ এখন সেনা চিকিৎসালয়লৈ প্ৰেৰণ কৰা হয় যদিও গুৰুতৰভাৱে আঘাতপ্ৰাপ্ত সাতজন সেনাৰ মৃত্যু হয়।
সেনা জোৱান কেইজনৰ মৃত্যু নিশ্চিত কৰি মুখপাত্ৰ গৰাকীয়ে আন কেইবাজনো সেনা গুৰুতৰভাৱে আঘাতপ্ৰাপ্ত হৈছে বুলি জানিবলৈ দিয়ে।
আনহাতে আহত সেনা জোৱানসকলৰ বাবে উন্নত চিকিৎসা সেৱা প্ৰদানৰ ব্যৱস্থা কৰা হৈছে বুলিও তেওঁ উল্লেখ কৰে।
গুৰুতৰভাৱে আঘাতপ্ৰাপ্ত সৈনিকসকলক উন্নত চিকিৎসাৰ বাবে আন স্থানলৈ স্থানান্তৰিত কৰাৰ উদ্দেশ্যে বায়ুসেনাৰ পৰা আকাশী পৰিবহনৰ সহায় আহ্বান জনোৱা হৈছে বুলি তেওঁ লগতে সদৰি কৰে।