৭০ বছৰীয়া ব্যক্তিয়ে বিয়া কৰাব বিচাৰে পি ভি সিন্ধুক; বিয়া নিদিলে পলুৱাই নিয়াৰ ভাবুকি
তামিলনাডুৰ ৰামানাথাপুৰম জিলাৰ মালায়স্বামী নামৰ এজন ৭০ বছৰীয়া লোকে বিয়া কৰাব বিচাৰিছে ভাৰতীয় বেডবিণ্টন তাৰকা পি ভি সিন্ধুক।
পি ভি সিন্ধুক বিয়া কৰাবৰ বাবে আনকি ৭০ বছৰীয়া লোকগৰাকীয়ে জিলা উপায়ুক্তৰ হাতত এখন আবেদনো দাখিল কৰিছে।
আবেদনখনত মালায়স্বামীয়ে ২৪ বছৰীয়া তাৰকা বেডমিণ্টন খেলুৱৈগৰাকীক বিয়া কৰাৰ বিচাৰে বুলি স্পষ্ট ভাষাৰে উল্লেখ কৰিছে।
আনহাতে, যদিহে পি ভি সিন্ধুৰ সৈতে বিয়াৰ বাবে প্ৰয়োজনীয় ব্যৱস্থা গ্ৰহণ কৰা নহয় তেন্তে তেওঁ সিন্ধুক পলুৱাই লৈ যাব বুলিও কয়।
ৰামানাথাপুৰম জিলাৰ উপায়ুক্তই প্ৰতি সপ্তাহত স্থানীয় নাগৰিকৰ সৈতে অনুষ্ঠিত কৰা বৈঠকৰ সময়তে ঘটনাটো সংঘটিত হয় বুলি জানিব পৰা গৈছে।
বৈঠকৰ সময়ত মালায়স্বামীয়ে জিলা উপায়ুক্তগৰাকীৰ ওচৰলৈ নিজৰ আৰু সিন্ধুৰ ফটো সংলগ্ন এখন পত্ৰ লৈ যায় আৰু তেওঁ সিন্ধুৰ সৈতে বিয়াত বহিব বিচাৰে বুলি উল্লেখ কৰে।
তদুপৰি, মালায়স্বামীয়ে নিজকে ১৬ বছৰীয়া বুলি উল্লেখ কৰি তেওঁৰ জন্ম ২০০৪ চনত হোৱা বুলি কোৱাৰ লগতে তেওঁ সিন্ধুৰ ক্ৰীড়া জগতত উন্নতিত আকৰ্ষিত হৈ সিন্ধুক জীৱন সংগী কৰিব বিচাৰে বুলি উল্লেখ কৰে।
সিন্ধুক বিয়া কৰাব বিচৰা ৭০ বছৰীয়া লোক গৰাকীৰ বাতৰিটো সম্প্ৰতি ছ’চিয়েল মিডিয়া যোগে ভাইৰেল হৈ পৰিছে।
উল্লেখযোগ্য যে, কিছুদিন আগতে পি ভি সিন্ধুৱে বিশ্ব বেডমিণ্টন চেম্পিয়নশ্বিপত সোণৰ পদক দখল কৰিছিল।
বিশ্ব চেম্পিয়নশ্বিপত সোণৰ পদক দখল কৰাৰ পাছতে অলিম্পিকত ৰূপৰ পদক বিজয়ী খেলুৱৈ গৰাকীৰ প্ৰতি দেশত শিশুৰ পৰা বৃদ্ধলৈ মৰম বৃদ্ধি পাইছে।