ৰূপহীহাটত পাঁচ লক্ষাধিক টকাৰ নিচাযুক্ত ঔষধৰ সৈতে আটক এজন সৰবৰাহকাৰী

সোমাবাৰে নগাঁও আৰক্ষীয়ে ৰূপহীহাট আৰক্ষীৰ সহযোগত জিলাখনৰ ৰূপহীহাটৰ বিভিন্ন ঠাইত ড্ৰাগছৰ বিৰুদ্ধে ব্যাপক অভিযান চলায়।

অভিযানৰ সময়ত এজন ড্ৰাগছ সৰবৰাহকাৰীক কৰায়ত্ত কৰাৰ লগতে আৰক্ষীৰ অভিযানকাৰী দলটোৱে জব্দ কৰিবলৈ সক্ষম হয় ৭৮ টা নিচাযুক্ত ঔষধৰ বটলৰ কাৰ্টন।

ধৃত ব্যৱসায়ীজন ৰূপহীহাট তিনিআলিৰ আশ্চিক ইকবাল চৌধুৰী বুলি জানিবলৈ দিছে আৰক্ষীয়ে।

অভিযানকাৰী দলটোৱে আশ্চিকৰ ঘৰৰ পৰা জব্দ কৰা নিচাযুক্ত ঔষধৰ বটল খিনিৰ মূল্য আনুমানিক প্ৰায় পাঁচ লক্ষাধিক টকাৰ বুলি স্পষ্ট কৰিছে ৰূপহীহাট আৰক্ষীৰ ভাৰপ্ৰাপ্ত বিষয়া গৰাকীয়ে।

দীৰ্ঘদিন ধৰি অসাধু ব্যৱসায়ীটোৰ লগতে এটা ড্ৰাগছ সৰবৰাহকাৰী চক্ৰই অঞ্চলটোত নিচাযুক্ত ঔষধৰ বেহা চলাই থকাৰ খবৰ পাইছিল আৰক্ষীয়ে।

অৱশ্যে পৰৱৰ্তী সময়তো এনে ধৰণৰ সমাজ বিৰোধী চক্ৰ উৎখাত কৰিবলৈ আৰক্ষীয়ে অভিযান চলাই যাব বুলি জানিবলৈ দিয়ে।