অখিল গগৈৰ মুক্তিৰ দাবীত নুমলীগড়ৰ পৰা পদযাত্ৰা কৰি কেন্দ্ৰীয় কাৰাগাৰত উপস্থিত চাৰিগৰাকী যুৱক

কৃষক মুক্তি সংগ্ৰাম সমিতিৰ নেতা অখিল গগৈৰ মুক্তিৰ দাবীত পিনতু গগৈ, হিৰক জ্যোতি শইকীয়া, যতীন ফুকন আৰু প্ৰাঞ্জল বৰা নামৰ চাৰিজন যুৱকে নুমলীগড়ৰ পৰা গুৱাহাটী কেন্দ্ৰীয় কাৰাগাৰলৈ পদযাত্ৰা আৰম্ভ কৰিছে।বিগত ৯ মাৰ্চত নুমলীগড়ৰ পৰা গুৱাহাটীৰ কেন্দ্ৰীয় কাৰাগাৰলৈ পদযাত্ৰা আৰম্ভ কৰা যুৱক চাৰিজনে কোনো দল, সংগঠনৰ বেনাৰত পদযাত্ৰা নকৰি সম্পূৰ্ণ নিজাববীয়াকৈ কৰিছিল বুলি প্ৰকাশ কৰে।

দহ দিনৰ মূৰত প্ৰায় ২৬০ কিঃমিঃ দূৰত্ব খোজ কাঢ়ি আজি ৰাতিপুৱা ৯:৩০ বজাত লখৰাস্থিত কেন্দ্ৰীয় কাৰাগাৰত উপস্থিত হয় যুৱক কেইজন।

অহৰহভাৱে দহদিন ধৰি খোজ কাঢ়ি অহাৰ বাবে ভৰিৰ ছাল ছিঙি গৈছিল যুৱককেইজনৰ, তথাপি থমকি ৰোৱা নাছিল তেওঁলোক।

পদযাত্ৰাৰ সময়ত মূৰ আৰু ডিঙিত অসমীয়াৰ স্বাভিমান গামোচা আৰু অখিল গগৈৰ ছবি সম্বলিত টি চাৰ্ট পৰিধান কৰি পদযাত্ৰা কৰিছিল যুৱক কেইজনে।

‘‘জনতাৰ কণ্ঠ অখিল গগৈক বিনা চৰ্তত মুকলি কৰি দিয়ক,’’ যুৱক কেইগৰাকীৰ দাবী।

যুৱক কেইজনৰ মাজৰ পিনতু গগৈৰ চৰকাৰলৈ প্ৰশ্ন ‘‘অসমীয়াৰ হৈ মাত মাতিলেই মাওবাদী হয় নেকি? যদি তেনেই হয় আমি হাজাৰ বাৰ অসম মাতৃৰ হকে মাত মাতি যাম।’’

ইয়াৰ পাছতো যদি অখিলক মুক্তি নিদিয়ে তেন্তে দিছপুৰৰ দিল্লীলৈ পদযাত্ৰাৰ হুংকাৰ দিয়ে যুৱক কেইজনে।

কেন্দ্ৰীয় কাৰাগাৰত উপস্থিত হৈ যুৱক কেইজনে কৃষক নেতা অখিল গগৈক সাক্ষাৎ কৰে।

কেন্দ্ৰীয় কাৰাগাৰত যুৱক কেইজনক কৃষিক মুক্তি সংগ্ৰাম সমিতিৰ সদস্য, অন্য জাতীয় দল সংগঠনৰ বহু নেতাই আহি সাক্ষাৎ কৰা পৰিলক্ষিত হয়।