দিল্লীৰ নিজামুদ্দিন দৰগাহ মাৰ্কাজ জামাতত আৱদ্ধ শিৱসাগৰৰ কেইবাজনো লোক; ওলাল এজনৰ পৰিছয় 

দিল্লীৰ নিজামুদ্দিন দৰগাহ মাৰ্কাজৰ জামাতত ১০ জনতকৈ অধিক লোক কভিড-১৯-ত আক্ৰান্ত হৈ মৃত্যু হোৱা খবৰে সৰ্বত্ৰে আতংকৰ সৃষ্টি কৰি থকাৰ সময়ত নিজামুদ্দিন দৰগাহ শ্বৰীফৰ মাৰ্কাজ জামাতত শিৱসাগৰৰ বহুকেইজন লোক আৱদ্ধ হৈ থকাৰ বিষয়ে জানিব পৰা গৈছে।

উল্লেখযোগ্য যে, শিৱসাগৰ চহৰৰ সমীপৰ জয়সাগৰৰ জোনাকী নগৰৰ নিবাসী তথা মগৰাহাট মধ্য ইংৰাজী বিদ্যালয়ৰ  অৱসৰপ্ৰাপ্ত প্ৰধান শিক্ষক ৰেহিমুদ্দিন আহমেদ সহ জিলা খনৰ বিভিন্ন স্থানৰ পৰা বহুকেইজন  লোক আজি  প্ৰায় এমাহৰ পূব দিল্লীৰ  মাৰ্কাজ জামাতলৈ গৈছিল।

ক’ৰনা ভাইৰাছৰ আতংকৰ বাবে সমগ্ৰ দেশত কেন্দ্ৰীয় চৰকাৰে ল’কডাউন ঘোষণা কৰা বাবে সেইসকল ব্যক্তি দিল্লীৰ নিজামুদ্দিন দৰগাহত বৰ্তমানো আৱদ্ধ হৈ থাকিবলৈ বাধ্য হয় ।

বিশ্বৰ বিভিন্ন প্ৰান্তৰ পৰা অহা ইছলাম ধৰ্মীয় লোকসকলৰ লগত কেইবাদিনো অতিবাহিত কৰিব লগা হোৱাত শিক্ষক ৰেহিমুদ্দিন আহমেদ স্বাস্থ্যক লৈ সম্প্ৰতি পৰিয়ালটোৰ লোকসকল চিন্তিত হৈ পৰিছে ।

আজি ৰেহিমুদ্দিন আহমেদে পুত্ৰলৈ ফোন কৰি শিৱসাগৰৰ আটাইকেইজন ব্যক্তি কুশলে আছে বুলি জনায়।

ৰেহিমুদ্দিনৰ পুত্ৰই দিল্লীৰ চৰকাৰে পিতৃ সহ সকলো লোকক আজিৰে পৰা স্বাস্থ্য পৰীক্ষা কৰি আছে বুলি জানিবলৈ দিয়ে কিন্তু স্বাস্থ্য পৰীক্ষাৰ প্ৰতিবেদন আহি নোপোৱাৰ বাবে বৰ্তমানলৈকে তেওঁলোকৰ দেহত ক’ৰ’না ভাইৰাছৰ সংক্ৰমণ হৈছে নে নাই সেই বিষয়ে জানিব পৰা হোৱা নাই বুলি তেওঁ উল্লেখ কৰে।

ইপিনে, দিল্লীৰ মাৰ্কাজ জামাতত আৱদ্ধ হৈ থকা শিৱসাগৰৰ অন্য ব্যক্তি সকলৰ সন্দৰ্ভত বাতৰি প্ৰেৰণ কৰাৰ সময়লৈকে জানিব পৰা হোৱা নায়।

আজি শিৱসাগৰৰ স্বাস্থ্য বিভাগৰ এটা দলেও শিক্ষক ৰেহিমুদ্দিন আহমেদৰ ঘৰ পৰিদৰ্শন কৰে।