ল’কডাউনৰ মাজতে বাক্সাৰ নাগ্ৰীজুলিত চুলাই ঘাটিত আৰক্ষীৰ উচ্ছেদ অভিযান

ৰাজ্যত তলাবন্ধ চলি থকাৰ সময়তেই আজি আবেলি বাক্সা জিলাৰ নাগ্ৰীজুলিৰ কাউলীৰ লেংটা বজাৰত কুমাৰীকাটা আৰক্ষী চকীৰ ভাৰপ্ৰাপ্ত বিষয়া নিপন গগৈৰ নেতৃত্বত আৰক্ষীৰ এটা সজাতি দলে উপস্থিত হৈ কেইবাটাও চুলাই মদৰ ঘাটি উচ্ছেদ কৰে।

যি সময়ত সমগ্ৰ ভাৰতবৰ্ষৰ লগতে অসমতো ল’কডাউন মানি চলা হৈছে তেনে সময়তো সজাগ হোৱা নাই একাংশ লোক। কাউলীৰ লেংটা বজাৰত তলাবন্ধ চলি থকাৰ মাজতেই দৈনিক আবেলিৰ ভাগত দেখা যায় অগণন লোকৰ ভিৰ।

আজিও আবেলি লেংটা বজাৰত ৰাইজে জুম বান্ধি বজাৰ চলাই থকাৰ সময়তে কুমাৰীকাটা আৰক্ষীয়ে উপস্থিত হৈ বজাৰ বন্ধ কৰি দিয়াৰ লগতে বিলাতী সুৰা আৰু ২০ লিটাৰৰো অধিক চুলাই মদ জব্দ কৰাৰ লগতে মদৰ ঘাটি উচ্ছেদ কৰে।

ইতিমধ্যে কাউলীৰ এই বজাৰখনক লৈ সৃষ্টি হৈছে তীব্ৰ প্ৰতিক্ৰিয়া। ইপিনে আৰক্ষীৰ তৎপৰতাক শলাগ লৈছে অঞ্চলটোৰ সচেতন ৰাইজে।