১৫০ কিঃ মিঃ বাইকেৰে গৈ কেন্সাৰত আক্ৰান্ত শিশুক ঔষধ দিলে কেৰালাৰ এইজন ব্যক্তিয়ে

ল’কডাউনৰ মাজতে কেৰালাৰ এজন মেডিকেল ছাৰ্জেণ্টে দেখুওৱা মহানুভৱতাই সকলোৰে দৃষ্টি আকৰ্ষণ কৰিছে। লোকজনে ১৫০ কিঃ মিঃ দূৰত্ব বাইক চলাই গৈ কেন্সাৰ ৰোগত আক্ৰান্ত এটি ৪ বছৰীয়া শিশুক দৰৱ যোগান ধৰে।

জানিব পৰা মতে বৰ্তমান চলি থকা ল’কডাউনৰ বাবে প্ৰয়োজনীয় ঔষধ কিনিব নোৱাৰাত যোৱা মাৰ্চ মাহৰ পৰা শিশুটিৰ পৰিলয়ালটো দৰৱৰ অভাৱত আছিল।

সাধাৰণতে শিশুটিৰ কেম’থেৰাপিৰ বাবে পৰিয়ালটোৱে মাহত এবাৰ  থিৰুবনন্থপুৰমস্থিত ৰিজ’নেল কেন্সাৰ চেণ্টাৰলৈ যায়। কিন্তু ল’কডাউনৰ বাবে কেম’ য়ুনিটতো বন্ধ থকাত চিকিৎসকে শিশুটিক সাময়িকভাৱে ঔষধ ল’বলৈ উপদেশ দিয়ে।

পিছে শিশুটিৰ গৃহ জিলা আলাপুঝাত কেম’ দৰৱ উপলব্ধ নোহোৱাত তথা মজুত থকা দৰৱ শেষ হৈ পৰাত পলিয়ালটোৱে এন্থনি ৰাথেশ নামৰ এগৰাকী আৰক্ষী বিষয়াৰ কাষ চাপে।

ৰাথেশে তেওঁৰ বন্ধু এগৰাকী প্ৰাক্তন আৰক্ষী বিষয়া আৰু এতিয়া থিৰুবনন্থপুৰম মেডিকেল কলেজৰ ছাৰ্জেণ্ট বিষ্ণুক কথাটো জনায়।

বন্ধুৰ অনুৰোধত বিষ্ণুয়ে ৰিজনেল কেন্সাৰ চেণ্টাৰৰ পৰা প্ৰয়োজনীয় ঔষধ লৈ ৪ ঘণ্টা বাইক চলাই ১৫০ কিঃ মিঃ দূৰত থকা শিশুটিৰ ঘৰত দি থৈ আহে।