১.৭ লাখ সেনা জোৱানৰ চুটী বৃদ্ধি, চৰকাৰে ক’লে- তেওঁলোকক সংকটত পেলাব নোৱাৰি

ক’ৰ’না ভাইৰাছৰ ভয়াবহতাৰ প্ৰতি লক্ষ্য ৰাখি প্ৰধান মন্ত্ৰী মোদীয়ে ৩ মে’লৈকে পুনৰ বৃদ্ধি কৰিছে লকডাউন। এই সংকটৰ সময়চোৱাত চৰকাৰে সাধাৰণ জনতাৰ লগতে সেনা জোৱানসকলৰো যতন লোৱা পৰিলক্ষিত হৈছে।

লকডাউনৰ সময়ত দেশৰ সবাটোকৈ বৃহৎ কেন্দ্ৰীয় সৈনিক বল চি আৰ পি এফৰ ডিজি ড০ এ পি মহেশ্বৰীয়ে নিজৰ জোৱানসকলক সংকটত পেলাব বিচৰা নাই বুলি মন্তব্য কৰিছে।

তেওঁ কয় যে এই সময়ত জোৱানসকল য’ত আছে, আগন্তুক নিৰ্দেশ নোপোৱালৈকে তাতেই থাকক। অৰ্থাৎ কেন্দ্ৰীয় অৰ্ধ সামৰিক বাহিনীৰ যিসকল বিষয়া আৰু জোৱানে প্ৰথম পৰ্যায়ৰ লকডাউনৰ পূৰ্বে চুটীত গৈছিল সেইসকলক দ্বিতীয় পৰ্যায়ৰ লকডাউনতো ঘৰতে থাকিবলৈ কোৱা হৈছে।

চি আৰ পি এফৰ লগতে অন্য অৰ্ধসামৰিক বাহিনীয়েও এই নিৰ্দেশ জাৰি কৰিছে।

উল্লেখ্য যে. লকডাউনৰ পূৰ্বে চি আৰ পি এফৰ ১.৭ লাখ জোৱান ২১ দিনীয়া চুটীত গৈছিল। এই জোৱানসকলে কৰ্মত পুনৰ যোগ দিয়াৰ যোজা চলাই থকাৰ সময়তে লকডাউন জাৰি কৰা হ’ল। সেয়ে তেওঁলোকৰ চুটী ১৫ এপ্ৰিললৈকে বৃদ্ধি কৰা হ’ল।

চি আৰ পি এফৰ ডিজি মহেশ্বৰীয়ে কয় যে সকলো নহ’লেও কিছু জোৱানক ডিউটিলৈ মতাৰ কথা আছিল, ইয়াৰ বাবে ৰেইল মন্ত্ৰ্যালয়ৰ লগত কথা বতৰাও চলিছিল। কিন্তু ক’ৰ’নাৰ ভয়াবহতাৰ প্ৰতি লক্ষ্য ৰাখি আমি সেই সিদ্ধান্ত বাতিল কৰি জোৱানসকলক ঘৰতে থাকিবলৈ কোৱা হয়।

তেওঁ লগতে কয় যে চুটীত থকা জোৱানসকলক ডিউটিত মাতি অনা মানে বাকী জোৱানসকলক সংকটত পেলোৱা হ’ব।