ল’কডাউনৰ সময়ত বজালীত এগৰাকী চি আৰ পি এফৰ জোৱানে যুৱক-যুৱতীক দিছে যোগৰ প্ৰশিক্ষণ

ল’কডাউনৰ সময়ত মানসিক শক্তি বৃদ্ধিৰ বাবে মানৱ কলিতা নামৰ এগৰাকী চি আৰ পি এফৰ জোৱানে যুৱক-যুৱতী সকলক যোগাসনৰ শিক্ষা প্ৰদান কৰিছে।

বজালী অঞ্চলৰ বাসিন্দা মানৱ কলিতাই বিগত ফেব্ৰুৱাৰি মাহত বিবাহ পাশত আৱদ্ধ হৈছিল আৰু ল’কডাউনৰ বাবে তেওঁ কৰ্মস্থলী কাশ্মীৰলৈ যাব পৰা নায়।

‘‘মই আমাৰ ভবিষ্যত প্ৰজন্মক চাপ মুক্ত হৈ শক্তিশালী ৰোগ প্ৰতিৰোধী ক্ষমতাৰে সুস্থ শৰীৰৰ অধিকাৰী হোৱাটো বিচাৰো,’’ নৰ্থ-ইষ্ট নাওৰ আগত কলিতাই কয়।

চি আৰ পি এফৰ জোৱান গৰাকীয়ে সেই উদ্দেশ্যে গোবিন্দপুৰ গাঁৱত যুৱক-যুৱতী সকলক সামাজিক দূৰত্ব বজাই ৰাখি যোগাসনৰ প্ৰশিক্ষণ প্ৰদান কৰি আছে।

গোবিন্দপুৰ গাঁও বৰপেটা জিলাৰ বজালী মহকুমাত অৱস্থিত।

ল’কডাউনৰ সময়ত চি আৰ পি এফৰ জোৱান গৰাকীয়ে যুৱক-যুৱতী সকলৰ মাজত মাস্ক, শ্ৰৱণপ্ৰাছ আৰু দুখীয়া লোকৰ মাজত অত্যাৱশ্যকীয় সামাগ্ৰীৰো যোগান ধৰিছে।

উল্লেখযোগ্য যে, ক’ৰ’না ভাইৰাছৰ সংক্ৰমণৰ সময়ত প্ৰধান মন্ত্ৰী নৰেন্দ্ৰ মোদীয়ে আয়ুস মন্ত্ৰ্যালয়ৰ নিৰ্দেশনা অনুসৰি  দেশৰ জনসাধাৰণক শৰীৰৰ ৰোগ প্ৰতিৰোধী সক্ষমতা বৃ্দ্ধি কৰাৰ বাবে অনুৰোধ জনাই আহিছে।