ইন্দোৰত কৰ’না ভাইৰাছত আক্ৰান্ত থানাৰ ভাৰপ্ৰাপ্ত বিষয়াৰ মৃত্যু

কৰ’না ভাইৰাছৰ সংক্ৰমণৰ ফলত দেশত মৃত্যুৰ সংখ্যা বৃদ্ধি পাবলৈ লৈছে। মহাৰাষ্ট্ৰৰ পাছতেই কৰ’না আক্ৰান্ত লোকৰ মৃত্যুৰ সংখ্যা অধিক হৈছে মধ্য প্ৰদেশত।

মধ্য প্ৰদেশৰ ইন্দোৰত কৰ’না ভাইৰাছত আক্ৰান্ত আৰক্ষী পৰিদৰ্শক দেবেন্দ্ৰ চন্দ্ৰবংশীৰ মৃত্যু হয়।

ক’না ভাইৰাছৰ গ্ৰাসত স্বাস্থ্যকৰ্মীৰ পৰা আৰম্ভ কৰি আৰক্ষীলৈকে সকলো পৰিছে। মধ্য প্ৰদেশৰ ইন্দোৰ কৰ’না ভাইৰাছৰ হটস্পট হিচাপে চিনাক্ত হৈছে।

ইন্দোৰত যোৱা কেইদিনত কেইবাজনো স্বাস্থ্যকৰ্মী তথা আৰক্ষী কৰ’না ভাইৰাছত আক্ৰান্ত হৈছিল। ইয়াৰ ভিতৰত আৰক্ষী পৰিদৰ্শক দেবেন্দ্ৰ চন্দ্ৰবংশীৰো কোভিড-১৯ পজিটিভ পোৱা গৈছিল।

কোভিড-১৯ পজিটিভ পোৱাৰ পাছত আৰক্ষী পৰিদৰ্শক দেবেন্দ্ৰ চন্দ্ৰবংশীক হাস্পাতালত ভৰ্তি কৰোৱা হৈছিল। দেবেন্দ্ৰ চন্দ্ৰবংশী(৪৫) জুনী আৰক্ষী থানাৰ ভাৰপ্ৰাপ্ত বিষয়া আছিল।

বিগত ১০ দিন ধৰি চন্দ্ৰবংশী অৰৱিন্দ হাস্পাতলত চিকিৎসাধীন হৈ আছিল। যোৱা নিশা প্ৰায় তিনি বজাত চিকিৎসাধীন অৱস্থাতে তেওঁ শেষ নিশ্বাস ত্যাগ কৰে।

মধ্য প্ৰদেশত কৰ’না ভাইৰাছৰ দ্বাৰা সংক্ৰমিত ৰোগীৰ সংখ্যা ১৩০০তকৈয়ো অধিক হৈছে।