ল’কডাউনৰ মাজতে টীয়কৰ কাকজান নদীত অচিনাক্ত যুৱকৰ মৃতদেহ উদ্ধাৰ

সমগ্ৰ ৰাজ্যত ক’ৰ’না ভাইৰাছৰ সংক্ৰমণৰ বাবে ল’কডাউন চলি থকাৰ সময়তে যোৰহাট জিলাৰ টীয়কৰ লাহদৈগড় আৰক্ষী থানাৰ অন্তৰ্গত কাকজান আৰন্ধৰা গাঁৱত আজি এজন অচিনাক্ত যুৱকৰ মৃতদেহ উদ্ধাৰ হোৱা ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে।

উদ্ধাৰ হোৱা মৃতদেহটো কাকজান নদীৰ পানী-জুৱলীত ওপঙি আছিল। ঘটনাস্থলীত লাহদৈগড় আৰক্ষী উপস্থিত হৈ মৃতদেহটো উদ্ধাৰ কৰে আৰু মৰোণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে।

আনহাতে, মৃতদেহটো উৱলি যোৱা অৱস্থালৈক চাই দুই তিনি দিন আগতে যুৱকজনৰ মৃত্যু হোৱা বুলি ৰাইজে সন্দেহ প্ৰকাশ কৰিছে।

এই পৰ্যন্ত মৃত্যু হোৱা যুৱকজনৰ পৰিচয় লাভ কৰা হোৱা নায়।

ল’কডাউনৰ সময়ত যুৱকজনৰ মৃত্যু হৈছিল নে কোনোবাই পৰিকল্পিতভাৱে হত্যা কৰিছিল সেই সম্পৰ্কে আৰক্ষীয়ে বৰ্তমান তদন্ত অব্যাহত ৰাখিছে।

আৰক্ষীৰ তদন্তৰ অন্তত সকলো কথা পোহৰলৈ অহাৰ সম্ভাৱনা আছে।