টীয়কৰ সামাজিক গোটৰ সদস্যই নিৰ্মাণ কৰিলে মানসিকভাৱে অসুস্থ, অসহায় গৃহহীন যুৱকৰ ঘৰ

যোৰহাট জিলাৰ টীয়কৰ লাহিং লক্ষিবাৰী গাঁৱৰ মানসিকভাৱে কিছু অসুস্থ, অসহায় আৰু গৃহহীন এজন যুৱকৰ ঘৰ নিৰ্মাণ কৰি মানৱতাৰ উৎকৃষ্ট নিদৰ্শন দাঙি ধৰিছে অঞ্চলটোৰ এটা সামাজিক গোটৰ হৃদয়বান সদস্য সকলে৷

উল্লেখ্য যে আজি কেইবা বছৰো ধৰি মাথোঁ এখন ভগ্ন প্ৰায় চালিৰ তলত ৰ’দে-বৰষুণে অতি কষ্টেৰে জীৱন নিৰ্বাহ কৰি আহিছিল লাহিঙৰ কানু নামৰ মানসিকভাৱে অসুস্থ যুৱকজনে৷

শেহতীয়াকৈ ৰাইজৰ সহযোগত টীয়কৰ লাহিং অঞ্চলত বিভিন্ন ইতিবাচক কাম কৰি অহাৰ লগতে লকডাউনৰ সময়চোৱাত এই পৰ্যন্ত প্ৰায় ২৬৩ টা অভাৱী পৰিয়াললৈ সাহায্য আগবঢ়োৱা, ধুমুহাত বিধ্বস্ত হোৱা এগৰাকী অসহায় মহিলাৰ ঘৰ নিৰ্মাণ কৰা “প্ৰয়াস” নামৰ এটা সামাজিক গোটে তেওঁক সহায় কৰিবলৈ আগবাঢ়ি আহে।

মহানুভৱতাৰ পৰিচয় দাঙি ধৰা “প্ৰয়াস” নামৰ সামাজিক গোটটোৰ জনহিতৈসী কৰ্মসূচীক সকলোৱে আদৰণি জনাইছে।