ক’ৰ’নাৰ ত্ৰাস; নৱ শৰণীয়াৰ পাছতে বিটিআৰত ৰাজ্যপালৰ শাসনৰ দাবী বিজেপিৰ ৰাজ্যিক সভাপতি ৰঞ্জিত দাসৰ

সমগ্ৰ দেশজুৰি ক’ৰ’না ভাইৰাছে সন্ত্ৰাস চলাইছে। অসমতো এই ভাইৰাছৰ আতংকই বিৰাজ কৰিছে। ক’ৰ’নাৰ সংক্ৰমণৰ প্ৰতি লক্ষ্য ৰাখিয়েই বিটিএডিত বাতিল কৰা হ’ল যোৱা ৪ এপ্ৰিলত অনুষ্ঠিত হ’বলগীয়া পৰিষদীয় নিৰ্বাচন।

সেয়েহে বিটিআৰত ৰাজ্যপালৰ শাসন প্ৰৱৰ্তনৰ দাবী তুলিছিল কোকৰাঝাৰৰ সাংসদ নৱ শৰণীয়াই। তেওঁ আনকি ৰাজ্যপালক সাক্ষাৎ কৰি এই সন্দৰ্ভত স্মাৰক পত্ৰ প্ৰদান কৰিছিল।

শৰণীয়াৰ পাছতে এইবাৰ বিটিআৰত ৰাজ্যপালৰ শাসন দাবী কৰিছে বিজেপিৰ ৰাজ্যিক সভাপতি ৰঞ্জিত দাসে।

শনিবাৰে মন্ত্ৰী ক’লনিত এক সংবাদমেল সম্বোধন কৰি দাসে বিটিএডিত ৰাজ্যপালৰ শাসন প্ৰৱৰ্তন কৰিবলৈ কেন্দ্ৰীয় তথা ৰাজ্য চৰকাৰক আহ্বান জনায়।

‘সাম্প্ৰতিক পৰিস্থিতিৰ পৰিপ্ৰেক্ষিতত বিটিএডিৰ শাসনভাৰ ৰাজ্যপালৰ হাতলৈ নিব লাগে। নিৰ্বাচন ঘোষণা নোহোৱা সাধাৰণ অৱস্থাত বিটিএডিৰ কাৰ্যকাল সম্প্ৰসাৰণ(Extension)ৰ সাংবিধানিক ব্যৱস্থা থাকে যদিও বিটিএডিত ইতিমধ্যেই নিৰ্বাচন ঘোষণা কৰা হোৱাৰ পৰিপ্ৰেক্ষিতত তথা ক’ৰ’না মহামাৰীৰ কাৰণে তাৎক্ষণিকভাৱে উদ্ভৱ হোৱা এই পৰিৱেশ-পৰিস্থিতিত নিৰ্বাচন অনুষ্ঠিত কৰাটো অসম্ভৱ।‘ সংবাদমেলত দাসে এইদৰে কয়।

সেয়েহে বিটিএডি নিৰ্বাচন অনুষ্ঠিত নোহোৱা পৰ্যন্ত বিটিএডিৰ শাসনভাৰ অসমৰ ৰাজ্যপালে নিজৰ হাতলৈ আনিবৰ কাৰণে ৰাজ্যপালক আহ্বান জনায়।

ইতিমধ্যে যোৱা ১৬ এপ্ৰিলত এই সন্দৰ্ভত ৰাজ্যপালক সাক্ষাৎ কৰি বিটিএডিত ৰাজ্যপালৰ শাসনৰ দাবী তুলি স্মাৰক পত্ৰ প্ৰদান কৰিছিল ৰাজ্যিক বিজেপিয়ে।

‘ৰাজ্যপালৰ নিৰ্বাচনৰ দিন বৃদ্ধি কৰাৰ ক্ষমতা আছে তথাপি নিৰ্বাচন ঘোষণা হৈ যোৱাৰ পাছত সেই সীমা বৃদ্ধি কৰিব নোৱাৰে। এই নীতিৰ আধাৰত আমি তেওঁক অনুৰোধ জনাইছিলো যাতে তেওঁ নিজে বিটিআৰৰ শাসনভাৰ লয়।‘ সংবাদমেলত দাসে এইদৰে কয়।

এইক্ষেত্ৰত ৰাজ্যপালে বিহিত ব্যৱস্থা ল’ব বুলি দাসে আশা প্ৰকাশ কৰে।

গণ সুৰক্ষা পাৰ্টী, সাংসদ নৱ শৰণীয়াৰ পাছতে শাসকীয় দল বিজেপিয়ে ৰাজ্যপালক সাক্ষাৎ কৰি তেওঁৰ শাসন দাবী কৰাৰ পাছত এতিয়া স্বাভাৱিকতে প্ৰশ্ন হয় ‘বিটিআৰত হ’ব নেকি ৰাজ্যপালৰ শাসন?’