অৰুণাচলৰ ডিবাং ভেলীত ২.৭ লাখ গছ কাটি ১১৫০.০৮ হেক্টৰ বন ভূমিত নিৰ্মাণ কৰা হ’ব হাইড্ৰ’ পাৱাৰ প্ৰকল্প

কেন্দ্ৰীয় পৰিৱেশ মন্ত্ৰালয়ৰ বন উপদেষ্টা কমিটি( FAC)এ জৈৱ-বৈচিত্ৰৰ উৰ্বৰ ভূমি হিমালয়ৰ ভৌগোলিক মণ্ডলৰ অৰুণাচল প্ৰদেশৰ ডিবাং ভেলীত এটা হাইড্ৰ’পাৱাৰ প্ৰকল্প নিৰ্মাণৰ বাবে সেউজ সংকেট প্ৰদান কৰিব।

উক্ত হাইড্ৰ’পাৱাৰ প্ৰকল্পৰ বাবে ডিবাং ভেলীৰ বৰ্ষাৰণ্যখনৰ ২.৭ লাখ গছ  কটা হ’ব যাৰ ভূমিৰ পৰিমাণ হৈছে ১১৫০.০৮ হেক্টৰ বন ভূমি।

‘প্ৰকল্পৰ সংক্ৰান্তত স্থানীয় লোকৰ মতামত এতিয়াও শুনা হোৱা নাই। কাইলৈ(মঙলবাৰে) FACএ স্থানীয় লোকৰ মতামত শুনিব।’ এইদৰে কয় বন বিভাগৰ পৰিদৰ্শন সঞ্চালক অঞ্জন মোহান্তীয়ে।

মঙলবাৰে FAC উপ কমিটিয়ে প্ৰতিবেদন দাখিল কৰাৰ পিছত ৩,০৯৭ মেগাৱাট এটালিন হাইড্ৰ’-ইলেক্ট্ৰিক প্ৰকল্পটো কিছুমান চৰ্তসাপেক্ষে সংৰক্ষিত বনাঞ্চলখনত নিৰ্মাণৰ বাবে অনুমোদন দিয়াৰ কথা।

FAC এ কয় যে উপ কমিটিৰ সাতজন সদস্যই উক্ত প্ৰকল্পৰ বাবে প্ৰয়োজনীয় ভূমিৰ সন্ধানত অহা অক্টোবৰত উক্ত অঞ্চলটো পুনৰ ভ্ৰমণ কৰিব। তেওঁলোকে প্ৰকল্পটোৰ বাবে প্ৰয়োজনীয় ভূমি সংকোচন কৰিব পাৰি নেকি তাৰো প্ৰচেষ্টা চলাব।

উল্লেখ্য যে, প্ৰকল্পটোৰ বাবে বৰ্ষাৰণ্যখনৰ বৃহৎ অংশ ভূমিৰ লগতে ইয়াৰ জৈৱ-বৈচিত্ৰ ক্ষতিগ্ৰস্ত হ’ব। আনকি বৃহৎ সংখ্যক গছ কটা যাব, যিয়ে সমগ্ৰ অঞ্চলটোৰ জৈৱ-বৈচিত্ৰৰ প্ৰতি ভাবুকি স্বৰূপ হৈ উঠিব।

যোৱা ফেব্ৰুৱাৰি মাহত উপ কমিটিৰ এটা দলে উক্ত অত্যন্ত পত্যন্ত অঞ্চলটো বিচাৰি উলিয়াইছিল যিটো অঞ্চলত এনে বৃহৎ প্ৰকল্প নিৰ্মাণৰ বাবে প্ৰকৃতিগত বৃহৎ সম্ভাৱনা আছে।

উপ কমিটিৰ মতে এটালিন হাইড্ৰ’-ইলেক্ট্ৰিক পাৱাৰ কোম্পানী, অৰুণাচল প্ৰদেশ হাইড্ৰ’ পাৱাৰ ডেভল’পমেন্ট কোৰপ’ৰেশ্যনৰ লগতে জিণ্ডাল পাৱাৰ লিমিটেড(JPL)এ ১১৬৫.৬৬ হেক্টৰ ভূমিৰ পৰা ১১৫০.০৮ হেক্টৰলৈ সংকোচিত কৰিছে।

আনহাতে উক্ত প্ৰকল্পৰ বাবে কাটিবলগীয়া গছৰ পৰিমাণ ৩ লাখৰ পৰা ২.৭ লাখলৈ সংকোচিত কৰা হৈছে।

ৱাইল্ড লাইফ ইনষ্টিটিউট অৱ ইণ্ডিয়া(WII)ৰ এক অধ্যয়নত প্ৰকাশ পাইছে যে ৪১৩ বিধ উদ্ভিদ, ১৫৯ বিধ পখিলা, ১১৩ বিধ মকৰা জাতীয় কীট, ১৪ বিধ উভচৰ প্ৰাণী, ৩১ সৰীসৃপ, ২৩০ বিধ পক্ষী আৰু ২১ স্তন্যপ্ৰায়ী প্ৰাণীৰ আৱাস ভূমি হৈছে উক্ত বৰ্ষাৰণ্যখন।

কোম্পানীটোৱে ডিবাং বৰ্ষাৰণ্যৰ টাংগং আৰু ড্ৰি নদীৰ সংগমস্থলত উক্ত প্ৰকল্পটো নিৰ্মাণ কৰাৰ কথা।