আজি কেবিনেটৰ বৈঠকত কি কি সিদ্ধান্ত গ্ৰহণ কৰা হ’ল?; সংবাদমেল সম্বোধন চন্দ্ৰমোহন পাটোৱাৰীৰ

ক’ৰ’না সংক্ৰমণৰ লগতে ল’কডাউনৰ বিভিন্ন বিষয়ত আজি জনতা ভৱনত অনুষ্ঠিত হোৱা কেবিনেট বৈঠকৰ অন্তত মন্ত্ৰী চন্দ্ৰমোহন পাটোৱাৰীয়ে সংবাদমেল সম্বোধন কৰে।

সংবাদমেলত মন্ত্ৰী পাটোৱাৰীয়ে দ্বিতীয় পৰ্যায়ৰ ল’কডাউন সন্দৰ্ভত কেবিনেটৰ বৈঠকত আলোচনা কৰা হয় বুলি জানিবলৈ দিয়ে।

কেবিনেটৰ বৈঠকত হোৱা সিদ্ধান্ত মৰ্মে গ্ৰীণ জ’নত থকা গাঁও অঞ্চল সমূহৰ দোকান-পোহাৰ খুলিব পাৰিব যদিও বজাৰ সমূহ বন্ধ থাকিব বুলি পাটোৱাৰীয়ে কয়।

ল’কডাউন বৃদ্ধি সন্দৰ্ভত অসম চৰকাৰে সিদ্ধান্ত গ্ৰহণ নকৰে বুলি মন্তব্য কৰি চন্দ্ৰ মহোন পাটোৱাৰীয়ে ২ মে’লৈ আন্তঃজিলা যাতায়তৰ সময়সীমা বৃদ্ধি কৰা হৈছে বুলি কয়।

আনহাতে, ৰেড জ’নত থকা পাঁচখন জিলাত ল’কডাউন শিথিল নহয় বুলি পাটোৱাৰীয়ে জানিবলৈ দি সেই জিলা কেইখনৰ গাঁৱৰ দোকান-পোহাৰ খোলা নহ’ব বুলিও লগতে কয়।

তদুপৰি, ৰেড জ’ন জিলাৰ পৰা গ্ৰীণ জ’ন জিলাৰ ৫ কিলোমিটাৰ দূৰত্বলৈ সকলো বন্ধ থাকিব বুলিও তেওঁ লগতে কয়।

অসম চৰকাৰে ব্যৱস্থা কৰা আন্তঃজিলা যাতায়তৰ সময়ত এ এছ টি চি বাছেৰে প্ৰায় ২৭,০০০ মানুহ নিজ নিজ ঠাইলৈ উভতি গৈছে বুলিও সদৰি কৰে।

যিসকল লোকে এ এছ টি চি বাছেৰে যাব বিচাৰে তেওঁলোকে এতিয়াও বুকিং কৰিব পাৰে বুলিও পাটোৱাৰীয়ে কয়।

বিটিএডি নিৰ্বাচন সন্দৰ্ভটো কেবিনেটত আলোচনা কৰা হৈছে বুলি তেওঁ উল্লেখ কৰি নিৰ্বাচন সোনকালে অনুষ্ঠিত কৰিব লাগে কিন্তু মানুহৰ সমাগম নোহোৱাকৈ কেনকৈ অনুষ্ঠিত কৰিব পৰা যায় সেই বিষয়ত চৰ্চা কৰা হৈছে বুলি মত প্ৰকাশ কৰে।

‘‘ৰাজ্যিক নিৰ্বাচন আয়োগক জনসমাগম নোহোৱাকৈ কেনেদৰে নিৰ্বাচন অনুষ্ঠিত কৰিব পৰা যায় সেই সম্পৰ্কত আমি আহ্বান জনাম,’’ চন্দ্ৰমোহন পাটোৱাৰীয়ে লগতে কয়।