দ্বিতীয়বাৰ শৰীৰত কৰ’না সংক্ৰমণৰ সম্ভাৱনা নাই; দাবী গৱেষকৰ

কৰ’না ভাইৰাছৰ চৰিত্ৰ সম্পৰ্কে বিভিন্ন তথ্য ইতিমধ্যে প্ৰকাশ পাইছে আৰু ইয়াৰে কিছুমান সময়ত সত্য বুলি প্ৰমানিত হোৱাৰ বিপৰীতে আন কিছুমান ভুল বুলিও পোহৰলৈ আহিছে।

একেজন ব্যক্তিৰ ওপৰত কৰ’না সংক্ৰমণ ঘটিব পাৰে বুলি বিভিন্ন সূত্ৰই দাবী কৰা হৈছিল। আনকি এনে বহু খৱৰ প্ৰকাশো পাইছিল য’ত আৰোগ্য হৈ উঠা ৰোগী পুনৰ কৰ’নাত আক্ৰান্ত হোৱা বুলি কোৱা হৈছিল।

কিন্তু গৱেষকসকলে এইবাৰ দাবী কৰিছে যে মানৱ শৰীৰত কৰ’না ভাইৰাছৰ সংক্ৰমণ দ্বিতীয়বাৰ আৰু নহয়।

যোৱা ফেব্ৰুৱাৰি মাহত চীনৰ সীমা অতিক্ৰম কৰি কৰ’না ভাইৰাছ দক্ষিণ কোৰিয়াত বিয়পি পৰিছিল। মৃত্যুৰ আতংকৰ মাজত এই মাৰাত্মক ভাইৰাছক প্ৰতিহত কৰি দেশখনে বিশ্বৰ দৃষ্টি কাঢ়িবলৈ সক্ষম হৈছিল।

পিচে, ক্ষন্তেকৰ বাবে সান্তনা লাভৰ পাছতে কেইবাজনো সুস্থ হৈ উঠা ৰোগীৰ শৰীৰত দ্বিতীয়বাৰ কৰ’নাৰ সংক্ৰমণ ধৰা পৰে। প্ৰায় ৯০জনকৈ লোকক দ্বিতীয়বাৰৰ বাবে কৰ’নাত আক্ৰান্ত হোৱা বুলি কোৱা হৈছিল।

এইবাৰ দক্ষিণ কোৰিয়াৰ চিকিৎসা সম্পৰ্কীয় গৱেষকসকলে জানিবলৈ দিছে যে পৰীক্ষাৰ ভুলৰ বাবেহে এনে বিভ্ৰান্তিৰ সৃষ্টি হৈছিল আৰু কোনেও দ্বিতীয়বাৰ আক্ৰান্ত হোৱা নাই।

দক্ষিণ কোৰিয়াৰ ৰোগ নিয়ন্ত্ৰণ তথা প্ৰতিৰোধ সম্পৰ্কীয় কেন্দ্ৰ চিডিচিৰ গৱেষকসকলে স্পষ্ট কৰিছে যে মানৱ শৰীৰত কৰ’না ভাইৰাছে দ্বিতীয়বাৰ আক্ৰান্ত কৰা সম্ভৱ নহয়।

গৱেষকসকলে দাবী কৰা মতে পৰীক্ষাসমূহত সক্ৰিয় আৰু নিষ্ক্ৰিয় ভাইৰাছৰ পাৰ্থক্য ধৰিব নোৱাৰাৰ বাবেই বিভ্ৰান্তিৰ সৃষ্টি হৈছিল।

গৱেষকসকলে জানিবলৈ দিয়ে যে এইচআইভি বা চিকেনপক্সৰ দৰে ভাইৰাছসমূহে মানৱ শৰীৰৰ কোষৰ নিউক্লিয়াছত প্ৰৱেশ কৰিব পাৰে। বছৰ বছৰ ধৰি এই ভাইৰাছ সুপ্ত হৈ থাকি পুনৰ সক্ৰিয় হৈ উঠে। কিন্তু কৰ’না ভাইৰাছ কোষৰ নিউক্লিয়াছৰ বাহিৰত থাকে। গতিকেই ভাইৰাছটোৱে পুনৰ সংক্ৰমণ ঘটাব নোৱাৰে।

গৱেষকসকলৰ মতে, কৰ’না ভাইৰাছে এবাৰ আক্ৰান্ত কৰাৰ পাছত এন্টিবডীৰ পৰা সংক্ৰমণ প্ৰতিৰোধী ক্ষমতা সৃষ্টি কৰে যাৰ ফলত দ্বিতীয়বাৰ সংক্ৰমণৰ সম্ভাৱনা নাথাকে।