গৱেষকৰ দাবী: মাতৃদুগ্ধৰ ৰক্ষা কৱচ ভেদ কৰিবলৈ সক্ষম নহয় কৰ’না ভাইৰাছ!

শিশুক বেমাৰৰ পৰা সুৰক্ষিত ৰখাৰ ক্ষেত্ৰত মাতৃ দুগ্ধৰ দৰে শক্তিশালী কোনো দৰৱ নাই।

এক গৱেষণাত দাবী কৰা হৈছে যে প্ৰাণনাশী কৰ’না ভাইৰাছেও মাকৰ গাখীৰ খাই থকা শিশুক একো কৰিব নোৱাৰে।

শনিবাৰে প্ৰকাশ পোৱা এক বাতৰি অনুসৰি, নিউয়ৰ্কৰ স্কুল অফ মেডিচিন য়ুনিটৰ বিশেষজ্ঞৰ মতে মাতৃ দুগ্ধত এনে এন্টিবডী পোৱা গৈছে যিয়ে শিশুক সংক্ৰমণৰ পৰা বচাব পাৰে।

সংক্ৰমণৰ সময়ত বা পাছতো মাতৃয়ে শিশুক গাখীৰ খুৱাব পাৰে। কিয়নো মাতৃদুগ্ধৰ জৰিয়তে শিশুৰ সংক্ৰমণ ঘটিব নোৱাৰে।

মাউন্ট ছিনাই স্কুল অফ মেডিচিনৰ সহকাৰী অধ্যাপক ৰিবেকা পাৱেল আৰু তেওঁৰ সহযোগী দলৰ গৱেষণাই স্বীকাৰ কৰিছে যে মাতৃদুগ্ধত কৰ’নাৰে যুঁজ দিয়াৰ ক্ষমতা আছে।

ভাইৰাছটোৰ সৈতে যুঁজিবলৈ ইয়াৰ কিমান ক্ষমতা আছে আৰু ইয়াৰ দ্বাৰা ভাইৰাছটোৰ বিৰুদ্ধে যুঁজাৰ উপায় সন্ধানত বৰ্তমান গৱেষকৰ দলটো ব্যস্ত আছে।

বিশেষকজ্ঞসকলে অনুমান কৰিছে যে মাতৃদুগ্ধত মজুত থকা এন্টিবডী কৰ’নাৰে যুঁজত সহায়ক হ’ব পাৰে যদিও এইক্ষেত্ৰত বহু গৱেষণাৰ প্ৰয়োজন আছে।

অধ্যাপক পাৱেলে তেওঁলোকৰ গৱোষণাত কৰ’না সংক্ৰমণৰ পৰা সুস্থ হৈ উঠা ১৫গৰাকী মহিলাৰ ওপৰত অধ্যয়ন চলায়।

ইয়াৰে আশী শতাংশ মহিলাৰ দেহত এনে এন্টিবডী পোৱা গৈছে যিয়ে সংক্ৰমণাত্মক জ্বৰৰ দৰে বেমাৰৰ সৈতে যুঁজ দিবলৈ সক্ষম।

পাৱেলৰ মতে, গৱেষণাই দেখুৱাইছে যে মাতৃদুগ্ধত কোভিড-১৯ প্ৰতিৰোধৰ ক্ষমতা আছে।

চিকিৎসকৰ মতে শিশু অসুস্থ হ’লে বা কৰ’নাৰ দ্বাৰা সংক্ৰমিত হ’লেও মাকে সতৰ্কতাৰে নিশ্চিতভাৱে গাখীৰ খুৱাব লাগে।