ত্ৰিপুৰাত ক’ভিড-১৯ আক্ৰান্ত ১৫২ জনলৈ বৃদ্ধি, BSFত পুনৰ চিনাক্ত ১৬

ষোল্লজন লোক দেওবাৰে ত্ৰিপুৰাত ক’ভিড-১৯ পজিটিভ চিনাক্ত হৈছে আৰু ৰাজ্যখনত মুঠ আক্ৰান্তৰ সংখ্যা ১৫২লৈ বৃদ্ধি পাইছে।

নতুনকৈ চিনাক্ত হোৱা ক’ভিড-১৯ পজিটিভ ব্যক্তিকেইগৰাকীও ঢালাই জিলাৰ আম্বাছাস্থিত বি এছ এফৰ ৮৬নং বেটেলিয়নৰ।

চিনাক্ত হোৱাসকলৰ মাজত আছে এগৰাকী বিষয়া, ছগৰাকী মহিলা আৰু নটা শিশু।

শনিবাৰেও বি এছ এফৰ একেটা বেটেলিয়নতে সোতৰগৰাকী ব্যক্তি ক’ভিড-১৯ পজিটিভ চিনাক্ত হৈছিল।

মুখ্য মন্ত্ৰী বিপ্লব কুমাৰ দেবে টুইটাৰযোগে এই কথা সদৰী কৰিছে।

ALERT !

16 persons found #COVID19 POSITIVE in Tripura from 86th-Bn #BSF (Official:1, Female:6, Children: 9).

We are conducting max number of tests. 75 Samples from 3rd-Bn BSF tested but all reports are NEGATIVE.

➤ Total active cases:148
➤ Transferred out:02
➤ Recovered:02

— Biplab Kumar Deb (@BjpBiplab) May 10, 2020

শুকুৰবাৰে ৰাজ্যখনত ২৯ গৰাকী বি এছ এফ জোৱান আৰু এজন ট্ৰাক ড্ৰাইভাৰ ক’ভিড-১৯ আক্ৰান্তৰূপে চিনাক্ত হৈছিল।

তাৰ পূৰ্বেও চলিত সপ্তাহজুৰি ধাৰাবাহিকভাৱে বি এছ এফ বেটেলিয়নকেইটাত ক’ভিড-১৯ পজিটিভ চিনাক্ত হৈ আহিছিল।

মুখ্য মন্ত্ৰী দেবে সদৰী কৰা মতে ত্ৰিপুৰাস্থিত বি এছ এফৰ ৩নং বেটেলিয়নটো ৭৫গৰাকীৰ নমুনা পৰীক্ষা কৰা হৈছিল কিন্তু তেওঁলোক সকলো ক’ভিড-১৯ নিগেটিভ।

ঢালাই জিলাক ইতিমধ্যে ৰেড জ’নৰূপে ঘোষণা কৰা হৈছে।

তাৰোপৰি বি এছ এফৰ ১৩৮নং বেটেলিয়নৰ মুখ্য কাৰ্য্যালয়কে ধৰি গাণ্ডাচেৰা গাঁৱৰ এটা শিৱিৰ আৰু কৰীনা সীমা চকীক কণ্টেইনমেণ্ট জ’ন ঘোষণা কৰা হৈছে।

ৰাজ্যখনত বৰ্তমান সক্ৰিয় ৰোগী আছে ১৪৮ গৰাকী।

দুগৰাকী ক’ভিড-১৯ আক্ৰান্ত ব্যক্তিয়ে আৰোগ্য লাভ কৰিছে আৰু দুগৰাকীক আন ঠাইলৈ স্থানান্তৰ কৰা হৈছে।