লকডাউন ৪ : খুলি দিয়া হ’ল ষ্টেডিয়াম, হ’ব নেকি আই পি এল?

ক’ৰ’না ভাইৰাছৰ সংক্ৰমণ ৰোধৰ বাবে দেশত চলি থকা লকডাউন ৩১ মে’লৈকে পুনৰ বৃদ্ধি কৰা হ’ল। চতুৰ্থ পৰ্যায়ৰ লকডাউনত কি কি বন্ধ থাকিব আৰু কি কি খুলিব সেই সন্দৰ্ভত গৃহ মন্ত্ৰ্যালয়ে নিৰ্দেশনা জাৰি কৰিছে।

আজি জাৰি কৰা নিৰ্দেশনা অনুসৰি চতুৰ্থ পৰ্যায়ৰ লকডাউনত স্প’ৰ্টছ কমপ্লেক্স আৰু ষ্টেডিয়াম খোলাৰ অনুমতি প্ৰদান কৰিছে। কিন্তু ষ্টেডিয়ামত দৰ্শকক প্ৰৱেশ কৰিবলৈ দিয়া নহ’ব।

ষ্টেডিয়াম সমূহ খুলি দিয়াৰ লগে লগে এতিয়া সকলোৰে মনত এটা প্ৰশ্ন উদয় হৈছে যে বিশ্বৰ সবাটোকৈ ধনী টি-২০ ক্ৰিকেট লীগ আই পি এল দৰ্শক অবিহনে অনুষ্ঠিত কৰিব নেকি।

জানিব পৰা মতে, স্প’ৰ্টছ কমপ্লেক্স আৰু ষ্টেডিয়াম সমূহ কেৱল অনুশীলনৰ বাবেহে খুলি দিছে।

উল্লেখ্য যে ক’ৰ’না ভাইৰাছৰ সংহাৰৰ বাবে আই পি এলৰ ১৩ সংখ্যক সংস্কৰণটি বি চি চি আইয়ে অনিৰ্দিষ্ট কাললৈ স্থগিত কৰিছিল।

ইফালে চলিত বছৰৰ শেষৰ ফালে অষ্ট্ৰেলিয়াত অনুষ্ঠিত হ’ব লগীয়া টি-২০ বিশ্বকাপক লৈ আই চি চি আৰু অষ্ট্ৰেলিয়া ক্ৰিকেট ব’ৰ্ড কিছু অনিশ্চয়তাত আছে। এই সম্পৰ্কে অহা ২৮ মে’ত আই চি চিৰ ব’ৰ্ড সদস্যই এক বৈঠকত মিলিত হৈ বিশ্বকাপ অনুষ্ঠিত কৰা সন্দৰ্ভত সিদ্ধান্ত ল’ব।

যদি টি-২০ বিশ্বকাপ পিছুৱাই দিয়া হয় তেন্তে সেই সময়ত বি চি চি আইয়ে আই পি এল অনুষ্ঠিত কৰিব পাৰে বুলি বিভিন্ন সূত্ৰই প্ৰকাশ কৰিছে।