অভিলেখ সংখ্যক কৰ’না আক্ৰান্তৰ ঘটনা; দেশত ২৪ ঘন্টাত আক্ৰান্ত প্ৰায় ৮হাজাৰ লোক

দেশত কৰ’না ভাইৰাছৰ সংক্ৰমণৰ ক্ষেত্ৰত পুনৰ অভিলেখ সৃষ্টি হৈছে। ভাৰতত এদিনত প্ৰায় ৮হাজাৰ লোক কৰ’নাত আক্ৰান্ত হৈছে।

কোভিড-১৯ত আক্ৰান্তৰ সংখ্যাৰ দিশৰ পৰা ভাৰতে ইতিমধ্যে চীন, ইৰাণক অতিক্ৰম কৰিছে।

কেন্দ্ৰীয় স্বাস্থ্য মন্ত্ৰ্যালয়ৰ তথ্য অনুসৰি, যোৱা ২৪ ঘন্টাত দেশত ৭হাজাৰ ৯৬৪জন লোক কৰ’নাত আক্ৰান্ত হৈছে।

এদিনতে ইমান সংখ্যক লোক আক্ৰান্তৰ ক্ষেত্ৰত দেশত এয়া অভিলেখ।

দেশত এতিয়া মুঠ আক্ৰান্তৰ সংখ্যা হ’লগৈ ১ লাখ ৭৩হাজাৰ ৭৬৩জন। আনহাতে, মহাৰাষ্ট্ৰ, তামিলনাডু, দিল্লী আৰু গুজৰাটত আক্ৰান্তৰ সংখ্যা সৰ্বাধিক।

ইপিনে, স্বাস্থ্য মন্ত্ৰ্যালয়ৰ তথ্য অনুসৰি, যোৱা ২৪ ঘন্টাত ২৬৫জন লোকৰ মৃত্যু হৈছে।

সেইদৰে, দেশত কৰ’না আক্ৰান্ত ৰোগীৰ মৃত্যুৰ মুঠ সংখ্যা হৈছে ৪হাজাৰ ৯৭১জন। এতিয়ালৈকে ৮৬হাজাৰ ৪২২জন ৰোগী সুস্থ হৈ উঠিছে।

কৰ’না আক্ৰান্তৰ ক্ষেত্ৰত ৰাজ্যসমূহৰ ভিতৰত শীৰ্ষস্থানত আছে মহাৰাষ্ট্ৰ। দ্বিতীয় স্থানত তামিলনাডু আৰু ইয়াৰ পাছতে আছে দিল্লী।

অসমতো কৰ’না আক্ৰান্ত ৰোগীৰ সংখ্যা শুকুৰবাৰে ১০৫৭ জনলৈ বৃদ্ধি পাইছে।

কৰ’না আক্ৰান্তৰ ক্ষেত্ৰত বিশ্বৰ দেশসমূহৰ ভিতৰত ভাৰতৰ স্থান এতিয়া নৱম। এইক্ষেত্ৰত আমেৰিকা, ব্ৰাজিল, ৰাছিয়া, ব্ৰিটেইন, স্পেইন, ইটালী, ফ্লান্স আৰু জাৰ্মানীৰ পাছতেই ভাৰতৰ স্থান।