জলসংকট! পানীৰ অপব্যৱহাৰৰ বাবে ২২ টা পৰিয়ালক জৰিমনা প্ৰশাসনৰ

পানীৰ সংকটে ভয়াৱহ ৰূপ ধাৰণ কৰিছে কৰ্ণাটকত। চহৰখনত উদ্বেগজনক হাৰত দেখা দিয়া পানীৰ সমস্যাৰ বাবে কৰ্তৃপক্ষই পানীৰ ব্যৱহাৰৰ ক্ষেত্ৰত কঠোৰ নিয়ম প্ৰৱৰ্তন কৰিছে।

এনে নিয়ম উলংঘা কৰি গাড়ী ধোৱা আৰু বাগিচাৰ কামৰ দৰে অপ্ৰয়োজনীয় কামত খোৱাপানী ব্যৱহাৰ কৰাৰ বাবে ২২টা পৰিয়ালক জৰিমনা বিহিছে বাংগালুৰু কৰ্তৃপক্ষই।

ৰাজ্যত ভয়াৱহ নাটনিৰ মাজত পানী সংৰক্ষণ ব’ৰ্ডৰ নিৰ্দেশ উলংঘা কৰাৰ বাবে প্ৰতিটো পৰিয়ালে ৫ হাজাৰ টকাকৈ জৰিমনা ভৰিব লাগিব।

বাংগালুৰু পানী যোগান আৰু নলা ব’ৰ্ডে জনোৱা মতে, ২২টা পৰিয়ালৰ পৰা ১.১ লাখ টকা জৰিমনা সংগ্ৰহ কৰিছে। মহানগৰীৰ বিভিন্ন অঞ্চলৰ পৰা এই জৰিমনা সংগ্ৰহ কৰা হৈছে।

চলিত মাহৰ আৰম্ভণিতে বাংগালুৰু পানী যোগান আৰু নলা ব’ৰ্ডে পানীৰ সংকটৰ কথা মনত ৰাখি খোৱাপানীৰ সঠিক ব্যৱহাৰৰ পৰামৰ্শ দিছিল।

বাসিন্দাসকলক বাহন ধোৱা, নিৰ্মাণ, মনোৰঞ্জনৰ বাবে খোৱাপানী ব্যৱহাৰ নকৰিবলৈ বাংগালুৰু পানী যোগান আৰু নলা ব’ৰ্ডৰ পৰা আহ্বান জনোৱা হৈছিল।

ইফালে এনে নিয়ম পুনৰাই উলংঘা কৰাসকলৰ বাবে ব’ৰ্ডে ৫০০ টকা অতিৰিক্ত জৰিমনা বিহাৰ সিদ্ধান্ত লৈছিল। প্ৰতিবাৰেই আদেশ উলংঘা কৰাৰ সময়ত এই জৰিমনা আৰোপ কৰা হ’ব।