প্ৰাণৰ শিল্পী জুবিন গাৰ্গৰ ছমহীয়া মৃত্যু দিৱসত বিশেষ শ্ৰদ্ধাঞ্জলি অনুষ্ঠানৰ আয়োজন অসম নাগৰিক সন্মিলনৰ

অসমৰ সাংস্কৃতিক জগতৰ ভোটাতৰা জুবিন গাৰ্গৰ মৃত্যুৰ ছয় মাহ সম্পূৰ্ণ হোৱা উপলক্ষে অহা ১৯ মাৰ্চত এক দিছপুৰৰ শ্ৰীমন্ত শংকৰ একাডেমীৰ প্ৰেক্ষাগৃহত এক শ্ৰদ্ধাঞ্জলি অনুষ্ঠানৰ আয়োজন কৰিছে অসম নাগৰিক সন্মিলনে। বিয়লি ৩.৩০ বজাৰ পৰা আৰম্ভ হ’বলগীয়া এই কাৰ্যসূচীত শিল্পীগৰাকীৰ প্ৰতি গভীৰ শ্ৰদ্ধা নিবেদন কৰাৰ লগতে তেওঁৰ দৰ্শন আৰু অসাধাৰণ কৰ্মৰাজিৰ বিষয়ে আলোচনা কৰা হ’ব।

অসম নাগৰিক সন্মিলনৰ তৰফৰ পৰা জনোৱা হৈছে যে জুবিন গাৰ্গ কেৱল এজন প্ৰতিভাধৰ শিল্পীয়েই নাছিল, বৰঞ্চ তেওঁ আছিল অসমৰ ঐক্য আৰু সংহতিৰ এক অনন্য প্ৰতীক। অসমৰ সমাজ জীৱনৰ সংকট কালত তেওঁৰ দৰে এগৰাকী মহান শিল্পীৰ আকস্মিক বিদায় আজিও ৰাজ্যবাসীৰ বাবে এক অসহনীয় দুখৰ বিষয় হৈ আছে। শিল্পীগৰাকীৰ ছবি বা গীতসমূহৰ মাজেৰে তেওঁ আজিও প্ৰতিগৰাকী অসমীয়াৰ হৃদয়ত জীয়াই আছে যদিও তেওঁৰ ভৌতিক অনুপস্থিতিয়ে আজিও সমাজক ব্যথিত কৰি তোলে।

জুবিন গাৰ্গ আমাৰ মাজৰ পৰা গুচি গ’লেও তেওঁৰ গীত, সুৰ, কণ্ঠ আৰু আদৰ্শ সদায় অসমৰ সমাজত প্ৰতিধ্বনিত হৈ থাকিব বুলি উদ্যোক্তাসকলে মত প্ৰকাশ কৰিছে। সেয়েহে অহা ১৯ মাৰ্চ, বৃহস্পতিবাৰে অনুষ্ঠিত হ’বলগীয়া এই শ্ৰদ্ধাঞ্জলি অনুষ্ঠানটোলৈ ৰাজ্যৰ গুণমুগ্ধসকলক সাদৰ আমন্ত্ৰণ জনোৱা হৈছে। ড° হীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, আব্দুল মান্নান আৰু শান্তনু বৰঠাকুৰৰ দ্বাৰা গঠিত ছজনীয়া কমিটিয়ে সকলো ৰাইজৰে উপস্থিতি কামনা কৰিছে।