মৰিয়নিত গণ প্ৰহাৰত মৃত্যু হোৱা যুৱক দেৱশীষ গগৈৰ আত্মাৰ শান্তিৰ অৰ্থে টীয়কত আছুৰ বন্তি প্ৰজ্বলন

বিগত ২৯ মে’ত মৰিয়নিৰ গাভৰু বাগানত এচাম বৰ্বৰ লোকৰ গণ প্ৰহাৰত কৰুণ মৃক সাবতি ল’বলগীয়া হৈছিল নকছাৰীৰ যুৱক দেৱশীষ গগৈয়ে।

দেৱশীষৰ মৃত্যুত সমগ্র অসমতে শোকৰ ছাঁ পৰাৰ লগতে এই জঘন্য হত্যাকাণ্ডক সকলো স্তৰৰ লোকে একেমুখে ধিক্কাৰ দিছে।

মঙলবাৰে দেৱশীষৰ আত্মাৰ সদগতি কামনা কৰি যোৰহাট জিলাৰ টীয়কৰ শ্বহীদ বেদী প্ৰাঙ্গনত টীয়ক আঞ্চলিক ছাত্ৰ সন্থাই সামাজিক ব্যৱধান বজায় ৰাখি বন্তি প্ৰজ্বলন কৰে।

এই সময়চোৱাত সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগ, জাঁজী হেমনাথ শৰ্মা মহাবিদ্যালয়ৰ প্ৰবক্তা ড০ মণ্টু কুমাৰ বড়া, টীয়ক জাতীয় বিদ্যালয়ৰ সচিব সৌৰভ বৰা, টীয়ক আছুৰ সভাপতি ৰন্টু ভূঞা, যুৱ ছাত্ৰ পৰিষদৰ টীয়ক আঞ্চলিক সমিতিৰ সভাপতি হিমাংশু বৰুৱা, ৰেঙণি এটি আশাৰ সঞ্চালক বিজু শৰ্মা, টীয়ক আছুৰ উপ সভাপতি পাপু কলিতা, সহকাৰী সম্পাদক দীপাংকৰ বেজবৰা, প্ৰচাৰ সম্পাদক দীপাংকৰ দাস, সদস্য অংকুৰ দত্তকে ধৰি বহু কেইজন ছাত্ৰ কৰ্মী উপস্থিত থাকে।

আনহাতে, শিমলুগুৰি মৌজা আঞ্চলিক ছাত্ৰ সন্থাইও শ্বহীদ বেদী প্ৰাংগণত বন্তি প্ৰজ্বলন কৰে। এই কায্যসূচীত শিমলুগুৰি মৌজা আঞ্চলিক ছাত্ৰ সন্থাৰ উপদেষ্টা যদুমণি বৰুৱা, সভাপতি দেৱব্ৰত শইকীয়াকে ধৰি কেইবাজনো ছাত্ৰ কৰ্মী উপস্থিত থাকে ।

উল্লেখযোগ্য যে, দেৱাশীষৰ জঘন্য হত্যাকাণ্ডৰ সৈতে জড়িত থকাৰ অভিযোগত বৰ্তমানলৈ মুঠ ১১ গৰাকী লোকক আৰক্ষীয়ে আটক কৰিছে।