কাজিৰঙাত গঁড় হত্যাৰ সৈতে জড়িত বৃহৎ চোৰাং চিকাৰীৰ দল আটক; উদ্ধাৰ এ কে-৪৭, এ কে-৫৬ ৰাইফল

ল’কডাউনৰ মাজতে বিগত ৯ মে’ ত কাজিৰঙাৰ অগৰাতলি বনাঞ্চলৰ ডোৰামাৰী বিলৰ পাৰত এটা খৰ্গ বিহীন মতা গঁড়ৰ মৃতদেহ উদ্ধাৰ হৈছিল ৷

ঘটনাস্থলীত এ কে ৪৭ ৰাইফলৰ ৮ জাঁই ব্যবহৃত গুলীয়ো উদ্ধাৰ হৈছিল।

এই ঘটনাৰ পাচত বোকাখাত আৰক্ষী থানাত ৰজু হোৱা গোচৰৰ আধাৰত চোৰাং গঁড় চিকাৰীৰ বিৰুদ্ধে অভিযান আৰম্ভ হৈছিল।

অৱশেষত কাজিৰঙাৰ অগৰাতলিত গঁড় হত্যাত জড়িত সাত জনীয়া দুধৰ্ষ গঁড় চিকাৰী দলৰ তিনিজনক আটক কৰিবলৈ সক্ষম হয় কাৰ্বি আংলং জিলা আৰক্ষী ৷

১ জুনত আটক কৰা গঁড় চিকাৰী কেইজন হ’ল ক্ৰমে- মণিপুৰৰ চুড়াচান্দ পুৰৰ ডেভিড চিয়ামা, জখলাবন্ধাৰ শাকমুঠি চাহ বাগিছাৰ বিকি থাপা, নগাঁও চালনাৰ চাইমন লাৰকা ৷

ইফালে, উক্ত দলৰে মাংবই পাইটে নামৰ চিকাৰীজন নাগালেণ্ড অসম সীমান্তত আৰক্ষীৰে হোৱা গুলীয়াগুলীত ঘটনাস্থলীতে নিহত হয় বুলি আৰক্ষীৰ সুত্ৰত প্ৰকাশ পায় ৷

আটকাধীন চোৰাং চিকাৰীৰ দলটোৰ পৰা কাৰ্বি আংলং আৰক্ষীয়ে এটা এ কে-৪৭ , দুটা এ কে-৫৬ ৰাইফল, এটা ডাবল বেৰেল ৰাইফল,  চাৰিস সজীৱ গুলী, এটা গ্ৰেনেড আৰু কেতবোৰ সামগ্ৰী উদ্ধাৰ কৰে ৷

কাজিৰঙা ৰাষ্ট্ৰীয় উদ্যানৰ অগৰাতলি বনাঞ্চলত বিগত ৯ মে’ত হোৱা গঁড় হত্যাৰ লগতে জড়িত থকা বুলি ধৃত চিকাৰী কেইজনে আৰক্ষীৰ ওচৰত স্বীকাৰ কৰিছে।