জম্মু-কাশ্মীৰৰ নিৰ্যাতিত হিন্দু-মুছলমানৰ হাতে হাতে অস্ত্ৰ দিয়াৰ আহ্বান প্ৰাক্তন ডিজিৰ

কাশ্মীৰ উপত্যকাৰ সংখ্যালঘু হিন্দুৰ লগতে অত্যাচাৰিত মুছলমানসকলক নিজৰ জীৱন ৰক্ষাৰ কৰাৰ স্বাৰ্থত হাতে হাতে অস্ত্ৰ তুলি দিব লাগে। এই বিস্ফোৰক মন্তব্য জন্মু আৰু কাশ্মীৰ আৰক্ষীৰ প্ৰাক্তন ডিজি শেষ পাল বৈদ্যৰ।

প্ৰাক্তন ডিজি বৈদ্যই লগতে কয় যে তেওঁলোকৰ হাতত অস্ত্ৰ তুলি দিয়াৰ লগতে অস্ত্ৰ চালনাৰ প্ৰশিক্ষণ দিয়াও উচিত।

বৈদ্যৰ মতে জন্মু আৰু কাশ্মীৰৰ এই দুয়ো সম্প্ৰদায়ে নিজৰ আত্মৰক্ষাৰ বাবে সকলো ধৰণৰ পন্থা অৱলম্বন কৰি চাব পাৰে।

সম্প্ৰতি দক্ষিণ কাশ্মীৰৰ অনন্তনাগত কাশ্মীৰী পণ্ডিত পঞ্চায়তৰ প্ৰধান অজয় পণ্ডিত ভাৰতীক হত্যা কৰাৰ পিছত তাৰ পৰা উচ্ছেদিত কাশ্মীৰী পণ্ডিতসকলক সুৰক্ষাৰ বাবেও দাবী জনাইছে বৈদ্যই।

ইয়াৰোপৰি তেওঁ উক্ত উপত্যকাত থকা হিন্দুসকলৰ হাতত অস্ত্ৰ তুলি দিয়াৰো দাবী জনায়।

তেওঁ এই প্ৰসঙ্গত কয়, ‘এই দুই সম্প্ৰদায়ৰ হাতত অস্ত্ৰ তুলি দিলে বা তেওঁলোকক অস্ত্ৰৰ প্ৰশিক্ষণ দিলে যে কিবা বিশাল ক্ষতি হ’ব তেনে নহয়।’

কিদৰে এই প্ৰতিৰোধ গঢ়ি তুলিব পাৰি তাৰো এক নমুনা দাঙি ধৰিছে জন্মু আৰু কাশ্মীৰ আৰক্ষীৰ প্ৰাক্তন ডিজি শেষ পাল বৈদ্যই।

এই সম্পৰ্কে তেওঁ কয়, ‘উপত্যকাটোত গাঁও প্ৰতিৰোধ কমিটি বা ভিলেজ ডিফেন্স কমিটি(ভিডিচি) গঢ়ি তুলিব লাগিব। তেনে কৰিবলৈ পৰিকল্পনা কৰিব লাগিব। বিষয়টো কঠিন, কিন্তু অসম্ভৱ নহয়।’

প্ৰসঙ্গক্ৰমে বৈদ্যই কেবাটাও উদাহৰণ দিয়ে। ১৯৯৫ চনত তেওঁ তেতিয়া উধমপুৰৰ এছ পি আছিল। সেই সময়ত উক্ত অঞ্চলত ব্যাপকৰূপত হিংসাত্মক উপদ্ৰপৱ চলিছিল, হিন্দু লোকক হত্যা কৰা হৈছিল।

বাসিন্দাসকলক ৰক্ষাৰ কৰাৰ বাবে বাগানকোটত প্ৰথম ভিডিচি গঢ়ি তোলা হয়। ইয়াৰ পিছতে জম্মু ডিভিজনৰ চন্দ্ৰভাগা উপত্যকা অঞ্চলৰ সংখ্যালঘু হিন্দুসকলৰ সুৰক্ষাৰ বাবে তৎকালীন জম্মু-কাশ্মীৰৰ চৰকাৰে বহু ভিডিচি গঠন কৰি দিয়ে।

উক্ত অঞ্চলটোৰ অত্যাচিৰত হিন্দু আৰু মুছলমানসকলৰ সুৰক্ষাৰ বাবে ভিডিচিক অস্ত্ৰ প্ৰশিক্ষণ দিয়াৰ পিছতে এই পৰিকল্পনা ব্যাপকৰূপত সফল হৈছিল বুলি দাবী কৰে প্ৰাক্তন ডিজি বৈদ্যই।