বোকাখাতত বিয়াৰ ৰভাৰ তলত আন এক কাজিৰঙা

কাজিৰঙা ৰাষ্ট্ৰীয় উদ্যানৰ বনকৰ্মী পুলিন বৰা৷ ৰাষ্ট্ৰীয় উদ্যানখনৰ বিভিন্ন বনাঞ্চলত সুদীৰ্ঘ দিন কাম কৰি বিভিন্ন অভিজ্ঞতা আহৰণ কৰি সম্প্ৰতি ৰাষ্ট্ৰীয় উদ্যানখনৰ বোকাখাত বনাঞ্চলৰ নদীপৰীয়া মৰিয়াহোলাত কৰ্মৰত তেওঁ৷

জীৱনটো কাজিৰঙাৰ বন্যপ্ৰাণীৰ সৈতে কটাই বনকৰ্মী পুলিন বৰাই নিজৰ বুকুৰ মাজতো গঢ়ি তুলিলে অন্য এখন কাজিৰঙা৷ বন্যপ্ৰাণীৰ প্ৰতি প্ৰেম-ভালপোৱা৷

আজি পুলিন বৰাৰ কন্যাৰ বিয়া৷ ক’ভিড১৯ৰ ভয়াৱহ সংক্ৰমণৰ মাজতে বোকাখাতৰ কুৰুৱাবাহী দ্বিতীয় পৰংগনীয়া গাঁৱত অনুষ্টুপীয়াকৈ আয়োজন কৰা এই বিয়াই এতিয়া সৰ্বত্ৰ চৰ্চা লাভ কৰিছে৷

কিয়নো কন্যা পৰীৰ বিয়াৰ ৰভা তলিতে বনকৰ্মী পুলিন বৰাই নিৰ্মাণ কৰিছে অন্য এখন কাজিৰঙা৷ হেঁপাহ কন্যাৰ সম্প্ৰদানো কাজিৰঙাৰ বুকুতেই হওক৷ পশু-পক্ষীও সাক্ষী হওক তেওঁৰ কন্যাৰ সম্প্ৰদানৰ মুহূৰ্তৰ৷

এই পৰিকল্পনাৰেই স্থানীয় শিল্পী দুলাল বৰাৰ সহযোগত পুলিন বৰাই কন্যাৰ বিয়াৰ ৰভাতলিত কৃত্ৰিমভাৱে সাজি উলিয়াইছে কাজিৰঙা৷

দুখন অৰণ্য৷ এখনত সংস্থাপিত কৰিছে এটা গঁড় আৰু আনখন অৰণ্যত সংস্থাপিত কৰিছে এটা হাতী৷

এনে কাৰ্যৰ বাবে উৎসাহিত কৰিছে পুলিন বৰাৰ জ্যেষ্ঠ ভাতৃ সমাজকৰ্মী বলো বৰাই৷

কন্যাৰ সাঁজত পৰী বৰাও গৌৰৱান্বিত পিতৃৰ এনে ব্যতিক্ৰমী প্ৰচেষ্টাত৷

বিয়ালৈ অহা সকলোৰে মুখত শুনা গ’ল পুলিন বৰাৰ মহৎ উদ্দেশ্যৰ প্ৰশংসা৷