চীনৰ আগ্ৰাসন ৰুধিব ভাৰতে : কাশ্মীৰ এৰি লাডাখলৈ স্ৰোত বৈছে ভাৰতীয় সেনাৰ

লাডাখৰ ভাৰত-চীন সীমান্তৰ গালৱান উপত্যকাত চীনা সৈন্যই ভাৰতীয় সেনাৰ ওপৰত কৰা ৰক্তক্ষয়ী আক্ৰমণৰ পিছতে লাডাখত সেনাৰ মোতায়েন বৃদ্ধি কৰিছে ভাৰতে।

কাশ্মীৰ পৰা লাডাখলৈ প্ৰেৰণ কৰা ভাৰতীয় সেনাৰ লগতে অৰ্ধসামৰিক বাহিনী।

ইতিমধ্যে আইটিবিপি(ইণ্ড-তিব্বেটান ব’ৰ্ডাৰ পুলিচ)ৰ ২০ টা কোম্পানী কাশ্মীৰৰ পৰা লাডাখ সীমান্তলৈ প্ৰেৰণ কৰা হৈছে।

সংবিধানৰ ৩৭০ অনুচ্ছেদ প্ৰত্যাহাৰ কৰাৰ পিছতে কাশ্মীৰৰ বিভিন্ন অঞ্চলত মোতায়েন কৰা হৈছিল সেনা।

এতিয়া ৰাতিটোৰ ভিতৰতে সেইসমূহ সেনা বাহিনীক কাশ্মীৰৰ পৰা খালি কৰি লাডাখলৈ প্ৰেৰণ কৰিছে প্ৰতিৰক্ষা দপ্তৰে।

সেনা সূত্ৰৰ খবৰ অনুসৰি সেনা বাহিনীয়ে খালি কৰা কাশ্মীৰৰ ঠাইসমূহত এতিয়াৰ পৰা কেন্দ্ৰীয় সংৰক্ষিত আৰক্ষী বাহিনী(চিআৰপিএফ)এ পৰিস্থিতি চম্ভালিব।

উল্লেখ্য যে, কাশ্মীৰৰ পৰিস্থিত নিয়ন্ত্ৰণৰ বাবে সেনা, চিআৰপিএফ আৰু আৰক্ষীক লৈ এটা ক’ৰ গ্ৰুপ গঠন কৰিছিল দেশৰ গৃহ মন্ত্ৰালয়ে।

এই ক’ৰ গ্ৰুপৰ এক সূত্ৰই জনাইছে যে আইটিবিপিৰ ২০ টা কোম্পানী ইতিমধ্যে কাশ্মীৰৰ পৰা গৈ লাডাখত উপস্থিত হৈছে।

সূত্ৰটোৰ মতে কাশ্মীৰৰ পৰা আৰু সেনা লাডাখলৈ প্ৰেৰণ কৰা হ’ব।

উল্লেখ্য যে, ভাৰত-চীনৰ ৩,৪৮৮ কিলোমিটাৰ দৈৰ্ঘ্যৰ সীমান্তৰ পহৰাৰ দায়িত্ব আইটিবিপিৰ হাতত ন্যস্ত আছে আৰু বাহিনীটোক উচ্চ পাৰ্বত্য এলেকাত যুদ্ধ কৰাৰ প্ৰশিক্ষণো দিয়া হৈছে।

সূত্ৰটোৰ মতে আইটিবিপিৰ বাহিৰেও অন্য কিছু বাহিনীকো লাডাখলৈ প্ৰেৰণ কৰা হ’ব।

পঞ্চাৱত নিয়োজিত ১০ নং ইনফেন্ট্ৰী ডিভিজনৰ ৰোমিঅ’ বাহিনীকো লাডাখলৈ প্ৰেৰণ কৰা হ’ব।

সেনা সূত্ৰৰ খবৰ মতে ইতিমধ্যে ১০ নং ইনফেন্ট্ৰী ডিভিজনৰ ৰোমিঅ’ বাহিনীৰ কেবাটাও শিখ ইউনিটক লাডাখলৈ প্ৰেৰণ কৰা হৈছে।