চীনত পোৱা গৈছে ভয়ংকৰ নতুন শ্বোৱাইন ফ্লুৰ সন্ধান; পুনৰ মহামাৰীৰ আশংকা!

গৱেষকসকলে চীনত এবিধ নতুন শ্বোৱাইন ফ্লু বিচাৰি পাইছে। এইটোৱে কৰ’না মহামাৰীৰ সংকট বৃদ্ধি কৰাৰ সম্ভাৱনা দেখা গৈছে।

আমেৰিকাৰ ছায়েন্স জাৰ্ণেল PNAS ত প্ৰকাশ পাইছে এই ভয়ংকৰ তথ্য।

সন্ধান লাভ কৰা এই নতুন শ্বোৱাইন ফ্লু ৰোগ ২০০৯ত গোটেই বিশ্বত বিয়পি পৰা H1N1শ্বোৱাইন ফ্লুৰে বংশজ বুলি কোৱা হৈছে।

অৱশ্যে, এই নতুন শ্বোৱাইন ফ্লুক অধিক বিপদজনক বুলি কোৱা হৈছে।

চীনৰ কেইবাখনো বিশ্ববিদ্যালয় আৰু চীনৰ চেন্টাৰ ফৰ ডিজিজ কন্ট্ৰ’ল এণ্ড প্ৰিভেনশ্যনৰ বিজ্ঞানীসকলে কৈছে যে এই নতুন শ্বোৱাইন ফ্লু ইমান শক্তিশালী যে ই মানুহক গুৰুতৰভাৱে সুস্থ কৰি তুলিব পাৰে।

বিজ্ঞানীসকলে আশংকা কৰিছে যে কৰ’না মহামাৰীৰ সময়তে যদি এই নতুন শ্বোৱাইন ফ্লুৰ সংক্ৰমণ ঘটে তেতিয়াহ’লে বহু ডাঙৰ সংকটৰ সৃষ্টি হ’ব।

এই নতুন শ্বোৱাইন ফ্লুৰ নাম হৈছে G4। চীনৰ বিজ্ঞানীসকলে ইয়াৰ সন্ধানত ২০১১ৰ পৰা ২০১৮লৈকে গৱেষণা কৰিছে।

উক্ত সময়ছোৱাত বিজ্ঞানীসকলে চীনৰ ১০খন ৰাজ্যৰ পৰা ৩০হাজাৰ গাহৰিৰ নাকৰ পৰা স্বাৱ সংগ্ৰহ কৰি পৰীক্ষা কৰিছিল।

বিজ্ঞানীসকলে পৰীক্ষাত লাভ কৰা ১৭৯ বিধ শ্বোৱাইন ফ্লুৰ ভিতৰত G4 বেছিভাগ গাহৰিৰ মাজতে লাভ কৰে। ইয়াৰ পাছতে বিজ্ঞানীসকলে G4ৰ ওপৰত অধ্যয়ন আৰম্ভ কৰে।

অধ্যয়নত পোৱা যায় যে নতুন শ্বোৱাইন ফ্লু G4 মানুহক দ্ৰুতভাৱে আৰু গুৰুতৰভাৱে সংক্ৰমিত কৰিব পাৰে। অৰ্থাৎ বহু ক্ষিপ্ৰতাৰে ই মানুহৰ মাজত মহামাৰীৰ ৰূপ ধাৰণ কৰিব পাৰে।

বিজ্ঞানীসকলে দাবী কৰা মতে, চীনত গাহৰিৰ ফাৰ্মত কাম কৰা প্ৰতি দহজন লোকৰ ভিতৰত এজনৰ মাজত G4ৰ সংক্ৰমণ পোৱা গৈছে। বিজ্ঞানীসকলে এই লোকসকলৰ এন্টিবডী টেষ্ট কৰাৰ পাছত ইয়াৰ সংক্ৰমণৰ কথা ধৰা পৰে।

বিজ্ঞানীসকলে দাবী কৰা মতে চীনৰ জনসংখ্যাৰ প্ৰায় ৪.৪ শতাংশ লোক G4ৰ দ্বাৰা ইতিমধ্যে সংক্ৰমিত হৈছে।

অৱশ্যে, এই ফ্লু মানুহ পৰা মানুহৰ শৰীৰলৈ বিয়পাৰ প্ৰমান পোৱা হোৱা নাই। এই বিষয়ত এতিয়াও অধ্যয়ন চলি আছে।

চীনৰ বিজ্ঞানীসকলে তেওঁলোকৰ প্ৰতিবেদন উল্লেখ কৰা মতে যদিহে G4মানুহৰ পৰা মানুহলৈ সোঁচৰিবলৈ আৰম্ভ কৰে তেতিয়া এই মাহামাৰী ভয়ংকৰ হৈ পৰিব।

বৰ্তমান গাহৰি ফাৰ্মত কাম কৰা লোকসকলৰ ওপৰত দৃষ্টি ৰখাটো আটাইতকৈ জৰুৰী বুলিও প্ৰতিবেদনত কোৱা হৈছে।