WHOই দিলে আশাৰ বতৰা: দুসপ্তাহৰ ভিতৰতে পোৱা যাব পাৰে কৰ’নাৰ দৰৱৰ ট্ৰায়েল ৰিজাল্ট

সমগ্ৰ বিশ্বতে দ্ৰুতভাৱে বৃদ্ধি পাইছে মাৰাত্মক ভাইৰাছ কৰ’নাৰ সংক্ৰমণ।

শুকুৰবাৰে এদিনতে গোটেই বিশ্বত ২লাখতকৈয়ো অধিক লোকৰ দেহত ধৰা পৰিছে কোভিড-১৯ পজিটিভ।

ইয়াৰ মাজতে এক আশাৰ বতৰা দিছে বিস্ব স্বাস্থ্য সংস্থা (WHO)ই।

বিশ্ব স্বাস্থ্য সংস্থাৰ মতে আগন্তুক দুসপ্তাহৰ ভিতৰতে কৰ’না ভাইৰাছৰ দৰৱ ট্ৰায়েলৰ ফলাফল আহিব পাৰে।

ট্ৰায়েলৰ ফলাফল ইতিবাচক হ’লে কৰ’না ভাইৰাছৰ বহু প্ৰতীক্ষিত দৰৱ লাভ কৰি বিশ্ববাসী উপকৃত হ’ব পাৰে।

ভেকচিনৰ সমান্তৰালকৈ কৰ’নাৰ দৰৱকলৈয়ো গোটেই বিশ্বতে ক্ষিপ্ৰতাৰে গৱেষণা চলিছে।

বিশ্ব স্বাস্থ্য সংস্থাৰ মুৰব্বী টেড্ৰ’ছ আধানম ঘেব্ৰিয়াছুছে কয়,’’৩৯খন দেশৰ প্ৰায় চাৰে পাঁচ হাজাৰ কৰ’না আক্ৰান্ত ৰোগীৰ ওপৰত দৰৱৰ ছলিডাৰিটি ট্ৰায়েল চলোৱা হৈছে। আশা কৰো দুসপ্তাহৰ ভিতৰতে অন্তৰ্ৱতীকালীন ফলাফল পোৱা যাব।‘’

বৰ্তমান সমগ্ৰ বিশ্বতে কৰ’না আক্ৰান্ত ৰোগীৰ সংখ্যা ১ কোটি ১০লাখ অতিক্ৰম কৰিছে। বিগত সাতমাহ ধৰি এই মহামাৰী চলি আছে।

কৰ’নাৰ দৰৱৰ ৪টা ভাগত ট্ৰায়েল আৰম্ভ হৈছে। ষ্টেণ্ডাৰ্ড কেয়াৰত ৰেডিছিভিৰ, এন্টি মেলেৰিয়া দৰৱ হাইড্ৰক্সিক্ল’ৰ’কুইন, এইচ আই ভি ড্ৰাগ লপিনেভিৰ বা ৰাইট’নভিৰ আৰু লপিনেভিৰ অথবা ৰাইট’নেভিৰৰ সৈতে ইন্টাৰফেৰনৰ।

কৰ’নাৰ এই দৰৱ লাভত সফল হ’লে চিকিৎসক তথা চিকিৎসাকৰ্মীসকলে কৰ’না আক্ৰান্ত ৰোগীৰ চিকিৎসাৰ ক্ষেত্ৰত এক ডাঙৰ সকাহ লাভ কৰিব।