চীনৰ বিশ্বাসযোগ্যতাক লৈ এইবাৰ আঙুলি ইউ কেৰ বিদেশ সচিবৰ

ভাৰতৰে চীনৰ শেহতীয়া সংঘাতৰ মাজতে এইবাৰ ব্ৰিটিছ বিদেশ সচিব ডমিনিক ৰাবে আন্তঃৰাষ্ট্ৰীয় দায়বদ্ধতাৰ ক্ষেত্ৰত চীনৰ বিশ্বাসযোগ্যতাক লৈ প্ৰশ্ন উত্থাপন কৰিছে।

ঐতিহাসিক এক চুক্তিৰ জৰিয়তে লণ্ডনে হং কঙক চীনক গতোৱাৰ পিছত চীনে তাত নিৰাপত্তা আইন জাপি দিয়াক লৈ ব্ৰিটিছ বিদেশ সচিবজনে এই প্ৰশ্ন উত্থাপন কৰিছে।

“এইটো এটা বিশ্বাসৰ বিষয়, আৰু বিশ্বৰ বহু দেশে এই প্ৰশ্নটো সুধিছে….কাৰণ হং কঙৰ ক্ষেত্ৰত যদি তেওঁলোকে তেওঁলোকৰ কথা ৰাখিব বুলি বিশ্বাস কৰিব নোৱাৰি, তেওঁলোকৰ বহল আন্তঃৰাষ্ট্ৰীয় দায়বদ্ধতা অনুসাৰে চলিব বুলি তেওঁলোকক কিদৰে বিশ্বাস কৰিব পাৰি?” চি এন এনৰ বাতৰিত বিদেশ সচিবজনৰ উদ্ধৃতি।

ইউ কেত চীনা ৰাষ্ট্ৰদূতৰ এক মন্তব্যৰ পিছতে ব্ৰিটিছ বিদেশ সচিবজনে এই মন্তব্য কৰিছে।

ইউ কেত চীনা ৰাষ্ট্ৰদূত লিউ চিয়াওমিঙে ব্ৰিটেইনে হং কঙৰ বিষয়ত মাত মতাতো চীনৰ অভ্যন্তৰীণ বিষয়ত “অগ্ৰহণযোগ্য হস্তক্ষেপ” বুলি মন্তব্য কৰিছিল।

লণ্ডনে হং কঙৰ হাজাৰ হাজাৰ লোকৰ নাগৰিকত্বৰ বাবে এক পথ উলিয়াব বুলি মন্তব্য কৰিছে।

হং কঙৰ সংসদৰ অনুমোদন অবিহনেই এই আইন জাপি দিয়া হৈছে।

ইয়াৰ অধীনত চীনা আৰক্ষীক বিশেষ পৰিস্থিতিত ৱাৰেণ্ট অবিহনেই সম্পত্তিত তালাচী চলোৱা, সম্পদ বাজেয়াপ্ত কৰা, যোগাযোগ বিচ্ছিন্ন কৰা আৰু তথ্য আঁতৰাবলৈ ইণ্টাৰনেট চাৰ্ভিচ প্ৰভাইডাৰক বাধ্য কৰোৱা আদিৰ কৰ্তৃত্ব দিয়া হৈছে।

হং কঙত গণতান্ত্ৰিক স্বাধীনতা নোহোৱা কৰাৰ কাৰণে আমেৰিকাৰ ছীনেটে চীনক শাস্তি দিয়াৰ বাবে এক আইনত ইতিমধ্যে অনুমোদন জনাইছে।

বিদেশ সচিবজনে ইউ কেয়ো তেনে পদক্ষেপ লোৱাৰ কথা নূই কৰা নাই।