ৰাজ্যত হোৰাহোৰে বাঢ়িছে ক’ৰ’নাক্ৰান্ত : কাজিৰঙাত বানপানী পৰিদৰ্শনত ৰাজ্যৰ স্বাস্থ্য মন্ত্ৰী হিমন্ত ব্যস্ত

যোৱা কিছুদিন ধৰি ৰাজ্যত হোৰাহোৰে বাঢ়িছে কোভিড আক্ৰান্তৰ সংখ্যা। চলিত সপ্তাহত গঢ়ে হাজাৰো অধিক সংখ্যাত বাঢ়িছে কোভিড আক্ৰান্তৰ সংখ্যা।

ৰাজ্যত ২৩,৯৯৯ গৰাকী লোক ক’ৰ’নাত আক্ৰান্ত হোৱাৰ বিপৰীতে আক্ৰান্তৰ মৃতকৰ সংখ্যাই ইতিমধ্যে অৰ্ধ শতক অতিক্ৰম কৰিছে।

আনকি ৰাজ্যৰ কোভিড পৰিস্থিতি লাহে লাহে স্বাস্থ্য বিভাগৰ নিয়ন্ত্ৰণৰ বাহিৰলৈ গতি কৰাও পৰলিক্ষিত হৈছে।

এনে এক কোভিড দুৰ্যোগৰ সময়তে কাজিৰঙাত নৌকবিহাৰ কৰাত ব্যস্ত হৈ পৰিছে স্বাস্থ্য মন্ত্ৰী ডঃ হিমন্ত বিশ্ব শৰ্মা।

কৃষিমন্ত্ৰী অতুল বৰা, সাংসদ কামাখ্যা প্ৰসাদ তাছা, কাৰ্বি আংলং স্বায়ত্ত্ব শাসিত পৰিষদৰ মুখ্য কাৰ্যবাহী তুলিৰাম ৰংহাঙক লগত লৈ আজি কাজিৰঙাৰ কহঁৰা বনাঞ্চলৰ মিহিমুখৰ কাঠপৰা দৰ্শন চূড়াৰ সমীপৰ পৰা যন্ত্ৰ চালিত নাৱত উঠি প্লাবিত কাজিৰঙা দৰ্শন কৰে স্বাস্থ্যমন্ত্ৰী গৰাকীয়ে।

স্বাস্থ্য মন্ত্ৰী ডঃ হিমন্ত বিশ্ব শৰ্মাই আজি কাজিৰঙা পৰিদৰ্শনৰ কৰাৰ ফ’টো নিজা ফেইচবুক পেইজত ভাইৰেল কৰাৰ লগে লগে ৰাজ্যৰ চৌপাশে সৃষ্টি হৈছে প্ৰতিক্ৰিয়াৰ।

ৰাজ্যৰ এই কোভিড দুৰ্যোগৰ সময়ত নিজা স্বাস্থ্য বিভাগৰ দায়িত্ব সামৰি স্বাস্থ্য মন্ত্ৰী ডঃ হিমন্ত বিশ্ব শৰ্মাই সোঁৱে-বাওঁৱে নিজৰ অনুগতক লৈ সদলবলে নৌকাবিহাৰেৰে ৰাজকোষৰ ধন অপচয় কৰি কাজিৰঙা পৰিদৰ্শন কৰাৰ কিবা প্ৰয়োজন আছেনে?

মুখ্যমন্ত্ৰী সৰ্বানন্দ সোণোৱালৰ সৈতে শীতল ৰাজনৈতিক যুঁজত অৱতীৰ্ণ হৈছে নেকি স্বাস্থ্য মন্ত্ৰী হিমন্ত বিশ্ব শৰ্মা!

যাৰ ফলত নিজৰ বিভাগৰ দায়িত্ব এফলীয়া কৰি থৈ অকৰ্তৃত্বশীলভাৱে নিজৰ স্বঘোষিত কাৰ্যদক্ষতা প্ৰতিপন্ন কৰিবলৈ মুখ্যমন্ত্ৰীয়ে পৰিদৰ্শন কৰি অহা কিছুদিনৰ পিছতে দৌৰিল বানপীড়িত কাজিৰঙা ৰাষ্ট্ৰীয় উদ্যানলৈ!

মন্ত্ৰী হিমন্ত বিশ্ব শৰ্মাৰ আজিৰ কাজিৰঙা পৰিদশৰ্নে এনে বহু অস্বস্তিকৰ প্ৰশ্নৰ উদ্ৰেক কৰিছে ৰাজ্যৰ সচেতন নাগৰিকৰ মনত।

উল্লেখ্য যে, খোদ মুখ্যমন্ত্ৰী সৰ্বানন্দ সোণোৱালে যোৱা ১৬ জুলাইত বান নিয়্ন্ত্ৰণ মন্ত্ৰী কেশৱ মহন্ত, কৃষি বিভাগৰ মন্ত্ৰী অতুল বৰা আৰু ৰাজ্যসভাৰ সাংসদ কামাখ্যা প্ৰসাদ তাছাক লগত লৈ বানপীড়িত কাজিৰঙা পৰিদৰ্শন কৰি আহিছিল।

মুখ্যমন্ত্ৰীয়ে পৰিদৰ্শনকালত উদ্যানখনৰ শীৰ্ষ বিষয়া আৰু জিলা প্ৰশাসনৰ সৈতে কাজিৰঙাৰ বান পৰিস্থিতিৰ বুজ লোৱা লগতে উদ্যানখনৰ বান পৰিস্থিতিৰ মোকাবিলা কৰাৰ সম্পৰ্কতো আলোচনাত ভাগ লৈছিল।

আনকি উদ্যানখনৰ বানপীড়িত জীৱ-জন্তু উদ্ধাৰ আৰু সঠিকমতে খাদ্য যোগানৰ বাবেও উদ্যানখনৰ কৰ্তৃপক্ষৰ লগতে জিলা প্ৰশাসনক নিৰ্দেশ দি আহিছে মুখ্যমন্ত্ৰী সোণোৱালে।

ইয়াৰ উপৰিও বন বিভাগৰ মন্ত্ৰী পৰিমল শুক্লবৈদ্যই কিছুদিনৰ পূৰ্বে কাজিৰঙা ৰাষ্ট্ৰীয় উদ্যান পৰিদৰ্শন কৰাৰ লগতে সঘনে কাজিৰঙাৰ বান পৰিস্থিতি বুজ লৈ আছে।

কৃষি মন্ত্ৰী অতুল বৰায়ো বোকাখাতত বাহৰ পাতি কাজিৰঙাৰ বান পৰিস্থিতি বুজ লৈ থকাৰ খবৰ সংবাদ মাধ্যমত প্ৰকাশ পাই আহিছে।

তেনেস্থলত স্বাস্থ্য মন্ত্ৰী ডঃ হিমন্ত বিশ্ব শৰ্মাই কাজিৰঙা পৰিভ্ৰমণ কৰাৰ প্ৰয়োজনীয়তা ক’ত?

ইপিনে বানে প্লাৱিত কৰা কাজিৰঙা ৰাষ্ট্ৰীয় উদ্যানৰ ওখ ঠাইবোৰত আশ্ৰয় লৈ থকা বন্যপ্ৰাণীবোৰক ভি আই পিৰ নৌকাবিহাৰে বাৰে বাৰে আশ্ৰয়হীন কৰি আহিছে।

ইমানেই নহয় মন্ত্ৰীৰ হিমন্ত বিশ্ব শৰ্মাৰ কনভয়ে কঁহৰা বনাঞ্চলৰ মিহিৰমুখত ওখ ঠাইত আশ্ৰয় লৈ থকা এটা গঁড়ক খেদি বাট মুকলি কৰি কাজিৰঙা পৰিভ্ৰমণ কৰা বুলিও জানিব পৰা গৈছে।

যি সময়ত আশ্ৰয়হীন জীৱ-জন্তুসমূহে ওখ ঠাইত আশ্ৰয় ল’বলৈ ঘন বনাঞ্চলৰ পৰা বাহিৰলৈ উলাই আহিবলৈ বাধ্য হৈছে তেনে সময়তে মন্ত্ৰীৰ কনভয়ে ওখ ঠাইত আশ্ৰয় লৈ থকা জীৱ-জন্তুক স্থানচ্যুত কৰি বন্যপ্ৰাণীৰ প্ৰতি নিৰ্দয় আচৰণ কৰিছে।

এই কোভিড দুৰ্যোগৰ সময়ত কেৱল ৰাজনৈতিক সক্ৰিয়তা আৰু চৰকাৰী প্ৰভাৱ প্ৰতিপন্ন কৰিবলৈ চৰকাৰী ভ্ৰমণসূচী লৈ ৰোজকোষৰ ধন অপচয় কৰা নাই নে স্বাস্থ্যমন্ত্ৰী গৰাকীয়ে? এই প্ৰশ্নৰ উদয় হৈছে সচেতন ৰাইজৰ মাজত।