পুৰণিগুদামত কোভিড-১৯ৰ দ্ৰুত সংক্ৰমণ : ছেনিটাইজ কৰিবলৈকো অপাৰগ স্থানীয় প্ৰশাসন

নগাঁও জিলাৰ বৃহত্তৰ পুৰণিগুদামৰ বিভিন্ন অঞ্চলত সম্প্ৰতি কোভিড-১৯ৰ সংক্ৰমণ দ্ৰুত গতিত বৃদ্ধি পাইছে।

ঐতিহ্যমণ্ডিত অঞ্চলটোৰ ব্যাৱসায়ীক প্ৰাণ কেন্দ্ৰ হিচাপে পৰিচিত পুৰণিগুদাম কেঞাপট্টিত ইতিমধ্যে ৭ জনকৈ লোকৰ দেহত কোভিড-১৯ পজিটিভ ধৰা পৰিছে৷

জানিব পৰা মতে, পুৰণিগুদাম ৰাজ্যিক চিকিৎসালয়ৰ সমীপতে মৃদুল চন্দ্ৰ বৰা নামৰ লোকজনৰ বাসগৃহৰ চৌহদত ভাড়াতীয়া হিচাপে থকা শিশুসহ মুঠ পাঁচগৰাকীকৈ লোক ক্ৰমে অনামিকা বৰা(৩৪), পম্পী দাস(৩৫), লক্ষ্য ডেকা(৩৫), ঋতুপৰ্ণা ডেকা(২৪), নিহাৰিকা গোঁহাই(৭)ৰ দেহত যোৱা কালি কোভিড-১৯ পজিটিভ ধৰা পৰাৰ লগে লগে সমগ্ৰ অঞ্চলটোত গণ সংক্ৰমনৰ আশংকাই বিৰাজ কৰিছে।

আনহাতে পুৰণিগুদাম বৰুৱাচুকস্থিত বন্ধন বেঙ্কৰ এটা শাখা কাৰ্যালয়ত কৰ্মৰত মেনাজাৰসহ দুজনকৈ ক্ৰমে কাঢ়িবাৰি মিকিৰভাটাৰ নিবাসী বিকাশ পাটৰ(২৩) আৰু চাপৰমুখৰ নিবাসী প্ৰদীপ গগৈ(৩০) কোভিড-১৯ত আক্ৰান্ত হৈছে বুলি জানিব পৰা গৈছে।

আনহাতে পুৰণিগুদাম বৰুৱাচুক গাঁৱৰ নিবাসী ভাষ্কৰ্য্য শিল্পী পাৰ্থ প্ৰতিম বৰুৱা নামৰ লোকজনৰো যোৱা ৩ জুলাইত স্বেচ্ছাৰে স্বাৱ টেষ্ট কৰোৱাত কোভিড পজিটিভ ধৰা পৰাৰ পাছতে যোৱা কালি বৰুৱাৰ ভাতৃ লক্ষীনন্দন বৰুৱাৰ দেহতো ধৰা পৰে কোভিড পজিটিভ৷

ইতিমধ্যে পুৰণিগুদামৰ পৰা যোৱা কালি বন্ধন বেংকৰ কৰ্মচাৰী ক্ৰমে, বিকাশ পাটৰ, প্ৰদীপ গগৈ আৰু লক্ষ্য ডেকাৰ লগতে ডেকাৰ পত্নী ঋতুপৰ্ণা ডেকাক ডেৰ বছৰীয়া পুত্ৰসহ নগাঁৱৰ ধিঙস্থিত কোভিড কেয়াৰ চেন্টাৰলৈ নিয়া হয় যদিও আন তিনি গৰাকীকৈ কোভিড আক্ৰান্ত ভাৰাতীয়া লোকক মৃদুল চন্দ্ৰ বৰাৰ বাসগৃহতে সম্পূৰ্ণ চৰকাৰী নীতি-নিৰ্দেশনা অনুযায়ী আছুতীয়াকৈ ৰাখি চিকিৎসাৰ ব্যৱস্থা কৰিছে।

আনহাতে উক্ত ঠাইখন সৰ্বসাধাৰণৰ বাবে নিষিদ্ধ এলেকা হিচাপে ঘোষণা কৰিছে স্বাস্থ্য বিভাগে৷

উল্লেখ্য যে, পুৰণিগুদামৰ মিকিৰহাট, বৰুৱাচুক, কেঞাপতিকে ধৰি বিভিন্ন ঠাইত এজনৰ পাছত এজনকৈ লোকৰ দেহত কোভিড পজিটিভ ধৰা পৰাৰ পাছত গণ-সংক্ৰমণৰ আশংকা ঘণীভূত হৈছে যদিও সেই স্থান সমূহত স্থানীয় প্ৰশাসনে ছেনিটাইজ কৰাৰ ব্যৱস্থা কৰা দেখা পোৱা নাই৷

যাৰ বাবে বৃহত্তৰ অঞ্চলটোৰ সচেতন মহলে চৰম অসন্তুষ্টি প্ৰকাশ কৰা পৰিলক্ষিত হৈছে৷