ঠেলামৰাৰ ঘটনা: ডিজিপিক তদন্তৰ নিৰ্দেশ মুখ্য মন্ত্ৰীৰ

অসমৰ মুখ্য মন্ত্ৰী সৰ্বানন্দ সোণোৱালে শোণিতপুৰ জিলাৰ ঠেলামৰাৰ ঘটনাৰ তদন্তৰ বাবে আৰক্ষী সঞ্চালকপ্ৰধানক দায়িত্ব দিছে।

অসমৰ অতিৰিক্ত আৰক্ষী সঞ্চালকপ্ৰধান (আইন-শৃংখলা) জি পি সিঙে বৃহস্পতিবাৰে পৰিস্থিতিৰ বুজ লয়।

তেওঁ জনোৱা মতে ঘটনা সন্দৰ্ভত ঠেলামৰা আৰক্ষী থানাত তিনিটা গোচৰ পঞ্জীয়ন হৈছে আৰু প্ৰশাসনে পৰিস্থিতি নিৰীক্ষণ কৰি আছে।

“কালিৰ ঘটনাত জৰিত তিনিগৰাকীক ইতিমধ্যে আটক কৰা হৈছে। ঠেলামৰা আৰক্ষী থানাত তিনিটা গোচৰ পঞ্জীয়ন কৰা হৈছে। অঞ্চলটোত অতিৰিক্ত বাহিনী মোতায়েন কৰা হৈছে,” তেওঁ কয়।

ঢেকীয়াজুলি আৰু ঠেলামৰা থানা এলেকাত জাৰি কৰা সান্ধ্য আইন বাহাল আছে।

অৰ্ধসামৰিক বাহিনীয়ে সমগ্ৰ অঞ্চলটোত ফ্লেগ মাৰ্চ কৰিছে আৰু চোকা নজৰ ৰাখিছে।

ঢেকীয়াজুলিৰ বিধায়ক অশোক সিংহাল আৰু স্থানীয় বিধায়ক গণেশ লিম্বুৱেও আজি অঞ্চলটো পৰিদৰ্শন কৰে।

জিলা প্ৰশাসনে সকলোকে শান্তি আৰু সাম্প্ৰদায়িক সম্প্ৰীতি বজাই চলিবলৈ আহ্বান জনাইছে।