কা আৰু ই আই এ বাতিলৰ দাবীত মাৰ্ঘেৰিটাত আছুৰ উত্তাল ধৰ্মঘট

অসম আৰু অসমীয়াক মাধমাৰ শোধাই কেন্দ্ৰীয় তথা ৰাজ্য চৰকাৰে ‘কেব’ক ‘কা’লৈ ৰূপান্তৰ কৰিলে।

শেহতীয়াকৈ পৰিৱেশ প্ৰভাৱ নিৰূপণ অধিসূচনা, ২০২০ (Environment impact Assessment 2020)ৰ যোগেদি সমগ্ৰ ভাৰতবৰ্ষত বন সম্পৰ্কীয় বিভিন্ন ধৰণৰ বিধি পৰিৱৰ্তন কৰিবৰ কাৰণে চিন্তা-চৰ্চা কৰিছে।

ইয়াৰ তীব্ৰ বিৰোধিতা কৰি বৃহস্পতিবাৰে সদৌ অসম ছাত্ৰ সন্থাৰ মাৰ্ঘেৰিটা আঞ্চলিক সমিতিয়ে কেন্দ্ৰীয় চৰকাৰৰ বিৰুদ্ধে এক উত্তাল প্ৰতিবাদী ধৰ্মঘট কাৰ্যসূচীৰ ৰূপায়ণ কৰে।

উত্তৰ মাৰ্ঘেৰিটা ৰঙ্গমঞ্চত মাৰ্ঘেৰিটা আঞ্চলিক ছাত্ৰ সন্থাৰ সভাপতি চিন্তু গগৈ আৰু সম্পাদক ৰূপম বৰুৱাৰ নেতৃত্বত শতাধিক প্ৰতিবাদকাৰীয়ে কা ২০১৯ আৰু ই আই এ ২০২০ বাতিলৰ দাবীত ৰাজ্য তথা কেন্দ্ৰ চৰকাৰৰ বিৰুদ্ধে বিভিন্ন শ্ল’গানেৰে পৰিৱেশ উত্তাল কৰি তোলে।

পুৱা ১০ বজাৰ পৰা ১২ বজালৈকে প্ৰায় ২ঘণ্টা ধৰি কৰা এই প্ৰতিবাদৰ অন্তত প্ৰতিবাদ স্থলীত মাৰ্ঘেৰিটা মহকুমাৰ দণ্ডাধীশ অভিজিৎ গগৈৰ উপস্থিতিত ধৰ্মঘট কাৰ্যসূচী অন্ত পেলায়।

আনহাতে, প্ৰতিবাদকাৰী নেতৃত্বই সংবাদমাধ্যমৰ আগত “কা ২০১৯” আৰু “ই আই এ ২০২০” বাতিল নোহোৱা পৰ্য্যন্ত ধাৰাবাহিক আন্দোলনৰ কাৰ্যসূচী ৰাইজৰ সহযোগত গ্ৰহণ কৰা হ’ব বুলি হুংকাৰ প্ৰদান কৰে।