মহানগৰীত বনৰীয়া গাহৰিৰ আক্ৰমণত গুৰুতৰভাৱে আহত এজন লোকৰ হাস্পাতলত মৃত্যু

মহানগৰীত যোৱা শনিবাৰে বনৰীয়া গাহৰিৰ আক্ৰমণত গুৰুতৰভাৱে আহত হোৱা এজন লোকৰ চিকিৎসালয়ত আজি মৃত্যু হৈছে।

বন গাহৰিৰ আক্ৰমণত মৃত্যু হোৱা লোকজনক সৰ্থেবাৰীৰ বেলবাৰীৰ মকলেশ আলী বুলি জানিব পৰা গৈছে।

মকলেশ আলী অসম পুৰাতত্ব বিভাগৰ সঞ্চালকৰ কাৰ্যালয়ৰ চকীদাৰ আছিল।

উল্লেখযোগ্য যে, যোৱা ৮ আগষ্ট, শনিবাৰে মহানগৰীৰ মাজ মজিয়াত থকা আমবাৰী অঞ্চলত এটা বন গাহৰিয়ে সন্ত্ৰাসৰ সৃষ্টি কৰিছিল।

গুৱাহাটী প্ৰেছ ক্লাৱতো বন গাহৰিয়ে সন্ত্ৰাস চলাইছিল।

বন গাহৰিটোৱে প্ৰথমে গুৱাহাটী প্ৰেছ ক্লাৱত কৰ্মৰত ৰাজেন বাস্ফৰ নামৰ এজন কৰ্মচাৰীক আক্ৰমণ কৰি আহত কৰিছিল।

গাহৰি আক্ৰমণৰ এই সমস্ত ঘটনা CCTV ত বন্দী হৈছিল।

ইয়াৰ পিছতে অসম পুৰাতত্ব বিভাগৰ সঞ্চালকৰ কাৰ্যালয়ত প্ৰৱেশ কৰি গাহৰিটোৱে কাৰ্যালয়টোৰ কৰুণা বৰ্মণ নামৰ এগৰাকী কৰ্মচাৰীক আক্ৰমণ কৰিছিল।

পুৰাতত্ব বিভাগৰ কাৰ্যালয়ৰ পিছত অসম টেক্সটাইল ইনষ্টিটিউটৰ চৌহদত প্ৰৱেশ কৰি গাহৰিটোৱে দুজন লোকক আক্ৰমণ কৰি গুৰুতৰভাৱে আহত কৰিছিল।

সেই আক্ৰমণত পুৰাতত্ব বিভাগৰ দুই কৰ্মচাৰী মকলেছ আলী আৰু কৰুনা বৰ্মন গুৰুতৰভাৱে আহত হৈছিল।

তদুপৰি, টেক্সটাইল প্ৰতিষ্ঠানত কৰ্মৰত কৰ্মচাৰী লক্ষী বড়োও গাহৰিৰ আক্ৰমণত আহত হৈছিল।

গাহৰিটোৰ আক্ৰমণত মুঠতে ৪ জনকৈ লোক আহত হৈছিল।

আহত চাৰিজনৰ এজনক চিকিৎসাৰ বাবে MMCH ত, দুজনক GMCH আৰু এজনক উইনট্ৰব হাস্পতালত ভৰ্তি কৰা হৈছিল।

ইয়াৰে গুৰুতৰভাৱে আহত মকলেশ আলীৰ আজি মৃত্যু ঘটে।