দেশৰ স্বাস্থ্য আৰু পৰিয়াল কল্যাণ মন্ত্ৰ্যালয়ৰ যুটীয়া সচিৱ লাভ আগৰৱাল ক’ৰ’না প’জিটিভ

কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰ্যালয়ৰ যুটীয়া সচিৱ লাভ আগৰৱাল ক’ৰ’না ভাইৰাছৰ দ্বাৰা সংক্ৰমিত হৈছে।

লাভ আগৰৱালে টুইটাৰযোগে তেওঁ ক’ৰ’না প’জিটিভ হোৱা বুলি জানিবলৈ দিয়ে।

আনহাতে, প্ৰাৰম্ভিক পৰ্যায়ত স্বাস্থ্য বিভাগৰ নীতি অনুসৰি তেওঁ স্বগৃহতে আইছ’লেশ্যনত থাকিব বুলিও উল্লেখ কৰে।

”স্বাস্থ্য বিভাগৰ দলে মোৰ সংস্পৰ্শলৈ অহা সকলো লোকৰ চিনাক্ত কৰাৰ বাবে চেষ্টা অব্যাহত ৰাখিছে লগতে ময়ো মোৰ সকলো বন্ধু তথা সহকৰ্মীক ক’ৰ’না পৰীক্ষা কৰিবলৈ অনুৰোধ জনালো। আশাকৰো সকলোকে শীঘ্ৰেই লগ পাম,” আগৰৱালে লগতে কয়।

উল্লেখযোগ্য যে, দেশত ক’ৰ’না ভাইৰাছৰ সংক্ৰমণ আৰম্ভ হোৱাৰ পাছৰে পৰা লাভ আগৰৱালে সংবাদ মাধ্যমক সম্বোধন কৰি ক’ৰ’না ভাইৰাছ সম্বন্ধীয় সকলো ধৰণৰ তথ্য আগবঢ়াই আছিল।

আনহাতে, দেশৰ গৃহ মন্ত্ৰী অমিত শ্বাহ শুকুৰবাৰে চিকিৎসাৰ অন্তত ক’ৰ’না ভাইৰাছৰ সংক্ৰমণৰ পৰা মুক্ত হৈ উঠে।

গৃহ মন্ত্ৰী গৰাকীয়েও চিকিৎসকৰ পৰামৰ্শ অনুসৰি কেইদিনমান স্বগৃহতে আইছ’লেশ্যনত থাকিব বুলি জানিবলৈ দিছে।