বিজেপিয়ে আপৰ বিৰুদ্ধে মোক আন্দোলনত নামিবলৈ কোৱাটো দুৰ্ভাগ্যজনক : আন্না হাজাৰে

দুৰ্নীতি বিৰোধী সক্ৰিয় কৰ্মী আন্না হাজাৰে বিজেপিয়ে তেওঁক আপৰ বিৰুদ্ধে আন্দোলনত নমাৰ বাবে কৰা আহ্বানক দুৰ্ভাগ্যজনক আখ্যা দিছে।

এই সম্বন্ধে হাজাৰে দিল্লী বিজেপিলৈ এখন পত্ৰ প্ৰেৰণ কৰি বিজেপিয়ে দিয়া প্ৰস্তাৱ নাকচ কৰে।

”মই বিজেপিৰ পত্ৰখন পঢ়ি দুখ পাইছো……বিগত ছয় বছৰ ধৰি বিজেপি ক্ষমতাত আছে….আৰু এতিয়াও তেওঁলোকে এটা ১০×১২ ফুট জোখৰ সৰু কোঠাত বাসকৰা এজন ৮৩ বছৰীয়া বৃদ্ধ লোকক আহ্বান জনায়….যাৰ কোনো ক্ষমতা নাই। ইয়াতকৈ দুৰ্ভাগ্যজনক কি হ’ব পাৰে,” আন্না হাজাৰে দিল্লী বিজেপিলৈ লিখা পত্ৰত এইদৰে উল্লেখ কৰে।

উল্লেখযোগ্য যে, দিল্লী বিজেপিয়ে প্ৰখ্যাত গান্ধীবাদী নেতা আন্না হাজাৰেক দিল্লীৰ অৰবিন্দ কেজৰিৱাল নেতৃত্বাধীন আপ চৰকাৰৰ দুৰ্নীতিৰ বিৰুদ্ধে আন্দোলনত নমাৰ বাবে আহ্বান জনাই পত্ৰ প্ৰেৰণ কৰিছিল।

দিল্লী বিজেপিৰ পৰা পত্ৰ লাভ কৰাৰ পাছতে হাজাৰে পত্ৰযোগে বিজেপিৰ প্ৰস্তাৱ নাকচ কৰি উত্তৰ দিয়ে।

আন্না হাজাৰে কেন্দ্ৰৰ কংগ্ৰেছ চৰকাৰৰ বিৰুদ্ধে ৰামলীলা ময়দানত ব্যপক আন্দোলন কৰি তুলিছিল যি আন্দোলনে কংগ্ৰেছ চৰকাৰৰ ভেটি দুৰ্বল কৰি তুলিছিল আৰু ক্ষমতাৰ পৰা অপসাৰণত এক প্ৰধান ভূমিকা পালন কৰিছিল।